ایف بی آر نے ٹیکس کی مد میں 7ہزار ارب روپے جمع کرلئے

اسلام آباد(شوریٰ نیوز) ایف بی آر نے ٹیکس کی مد میں 7ہزار ارب روپے جمع کرلئے، 30 جون تک ٹیکس وصولیوں میں مزید اضافہ ہوگا،وزیر خزانہ ،فیڈرل بورڈ آف ریونیو (ایف بی آر) نے ملکی تاریخ میں پہلی مرتبہ محصولات کی مد میں 7ہزار ارب روپے اکٹھے کرلیے ہیں۔ ٹویٹر پر وزیر خزانہ اسحاق ڈار نے بتایا کہ ایف بی آر نے 26جون تک محصولات کی مد میں سات ہزار ارب روپے اکٹھے کر لیے ہیں اور 30 جون تک ٹیکس وصولیوں میں مزید اضافہ ہوگا۔دوسری جانب، قومی بچت اسکیم کے تحت شریعت کے مطابق مصنوعات متعارف کروانے کی تقریب سے خطاب کرتے ہوئے وزیر خزانہ اسحاق ڈار کا کہنا تھا کہ یکم جولائی سے 4 اسلامی بچت اسکیمیں متعارف کرائیں گے۔ پاکستان کے معاشی نظام کو سود سے پاک کرنے کیلیے اقدامات کر رہے ہیں، یکم جولائی سے نیشنل سیونگز کی 4 نئی پروڈکٹس لانچ کر رہے ہیں، بجٹ میں کہا تھا 30 جون تک نئی پروڈکٹس لانچ کریں گے۔