انفارمیشن ٹیکنالوجی کی برآمدات ماہانہ بنیادوں پر اگست2023 میں 10فیصد اضافے کے ساتھ بڑھ کر 235 ملین ڈالر ہوگئی ہیں تاہم یہ اضافہ جولائی کے مقابلے میں اگست میں کام کے دنوں میں اضافے یا چھٹیوں میں کمی کی وجہ سے ہوا ہے۔
وفاقی وزیر برائے انفارمیشن ٹیکنالوجی ڈاکٹر عمر سیف نے حال ہی میں آئی ٹی برآمدات کو 2.62 ارب ڈالر سے بڑھا کر 10 سے 20 ارب ڈالر تک پہنچانے کے عزم کا اظہار کیا ۔
امین الحق نے بھی آئی ٹی برآمدات کو 15 ارب ڈالر تک پہنچانے کے عزم کا اظہار کیا تھا تاہم آئی ٹی کی برآمدات میں کوئی خاطر خواہ اضافہ دیکھنے میں نہیں آیا۔
معاشی بحران کے سبب آئی ٹی سیکٹر کو بھی بہت سے مسائل کا سامنا کرنا پڑ رہا ہے، آئی ٹی کمپنیوں کو اسپیکٹرم کی الاٹمنٹ کیلیے فیس کا ڈالر میں وصول کیا جانا اور ٹیکسوں کی بلند شرح گروتھ میں اہم رکاوٹ ہیں۔
شعبہ جاتی سطح پر دیکھا جائے تو ماہانہ بنیادوں پر ٹیلی کام برآمدات میں 12فیصد جبکہ کمپیوٹر سروسز میں 9 فیصد اضافہ ہوا۔ گزشتہ ماہ میں آئی ٹی برآمدات 12 ماہ کی اوسط 218 ملین ڈالر سے بڑھ گئی۔