بلوچستان کابینہ کے اجلاس میں حکومت نے گندم نہ خریدنے کا فیصلہ کر لیا۔
گندم خریدنے کا فیصلہ بلوچستان میں محکمہ خوراک کے پاس پہلے سے گندم موجود ہونے اور جگہ نہ ہونے پر کیا گیا، گندم کی قیمتوں میں کمی کے باعث سابق کابینہ کے مقرر کردہ نرخ میں تبدیلی کر دی گئی۔
کابینہ نے گندم کی سو کلو بوری 5500 سے کم کر کے 4500 میں فروخت کرنے کی منظوری دے دی، وزیراعلیٰ نے استفسار کیا کہ کابینہ کے پہلے اجلاس کی منظوری کے بعد گندم کیوں فروخت نہیں کی گئی؟
وزیر خوراک نور محمد دمڑ نے کہا کہ پچھلے کابینہ اجلاس کے منٹ 4 اپریل کو جاری ہوئے تھے، جس پر وزیر اعلیٰ سرفراز بگٹی نے استفسار کیا کہ جب کابینہ نے فیصلہ کردیا تھا تو منٹس کا انتظار کیوں کیا؟۔
وزیر خوراک نے کہا کہ منٹس سے قبل ہی محکمہ خوراک نے گندم کی فروخت کا عمل شروع کیا تو اسسٹنٹ کمشنر نے چھاپہ مارا، اینٹی کرپشن نے محکمہ خوراک کے افسران گرفتار کئے جس کے باعث گندم فروخت میں تاخیر ہوئی۔
ضلعی انتظامیہ اور اینٹی کرپشن کی کارروائی پر وزیر اعلیٰ بلوچستان نے اظہار برہمی کیا اور کہا کہ جب کابینہ کا فیصلہ موجود تھا تو اینٹی کرپشن کون ہوتا ہے محکمے کے افسران کو گرفتار کرنے والا؟
وزیر اعلیٰ سرفراز بگٹی نے چیف سیکرٹری کو فوری طور پر سیکرٹری ایس اینڈ جی اے ڈی سے رپورٹ طلب کرنے کی ہدایت کی۔