فیڈرل بورڈ آف ریونیو (ایف بی آر) نے رجسٹرڈ ٹیکس دہندگان اور کاروباری افراد کی تفصیلات ایوان میں پیش کر دیں۔
دستاویزات کے مطابق ایف بی آر میں رجسٹرڈ ٹیکس دہندگان کمپنیوں اور کاروباری افراد کی تعداد 1 کروڑ 25 لاکھ تک پہنچ گئی، گزشتہ تین سال کے دوران رجسٹرڈ کاروباری ٹیکس دہندگان کی تعداد میں 53 لاکھ کا اضافہ ہوا۔
ایف بی آر میں رجسٹرڈ 82 لاکھ کاروباری افراد اور کمپنیاں پنجاب کی نکلیں، سندھ کی 28 لاکھ 76 ہزار، خیبرپختونخوا کی 8 لاکھ 18 ہزار کاروباری افراد اور کمپنیاں ایف بی آر میں رجسٹرڈ ہیں۔
اسی طرح اسلام آباد کی 4 لاکھ 67 ہزار، بلوچستان کے 2 لاکھ 21 ہزار کاروباری افراد اور کمپنیاں ایف بی آر میں رجسٹرڈ ہیں۔
ایف بی آر نے سرکاری اور غیر سرکاری تنخواہ دار ٹیکس دہندگان کی تفصیلات بھی جاری کر دیں، وزارت خزانہ نے تنخواہ دار ٹیکس دہندگان کی تفصیلات ایوان میں پیش کیں۔
سرکاری و غیر سرکاری تنخواہ دار ٹیکس دہندگان سے گزشتہ تین سال کے دوران ملازمین سے 820 ارب روپے ٹیکس وصول کیا گیا، گزشتہ تین سال کے دوران سرکاری تنخواہ دار ٹیکس دہندگان سے 186 ارب ٹیکس کی مد میں وصول کیا گیا۔
غیر سرکاری تنخواہ دار افراد سے گزشتہ تین سال کے دوران 634 ارب روپے وصول ٹیکس کی مد میں وصول کئے گئے۔
مالی سال 2023سے 24 کے دوران سرکاری اور نجی ٹیکس دہندگان سے 368 ارب ٹیکس وصول کیا گیا۔
گزشتہ تین سال کے دوران سرکاری ٹیکس دہندگان کی تعداد میں 1 لاکھ 94 ہزار کا اضافہ ہوا، نجی سیکٹر کے ٹیکس دہندگان کی تعداد میں گزشتہ تین سال کے دوران ساڑھے پانچ لاکھ افراد کا اضافہ ہوا۔