امریکی محکمہ خارجہ میں جنوبی وسطی ایشیاء امور کے اعلیٰ عہدے دار ایرک مائیر نے پاکستان منرلز انویسٹمنٹ فورم 2025 کے انعقاد پر خراج تحسین پیش کیا گیا۔
دو روزہ پاکستان منرلز انویسٹمنٹ فورم 2025 کا افتتاحی اجلاس آج منعقد ہوا، افتتاحی تقریب میں ملکی اور غیر ملکی معاشی ماہرین و مندوبین نے شرکت کی۔
افتتاحی تقریب میں شریک امریکی وزارت خارجہ کے اعلیٰ عہدے دار ایرک مائیر کا کہنا تھا کہ میں پاکستان کی مہمان نوازی سے لطف اندوز ہو رہا ہوں، میں پاکستانی حکام کو اس فورم کے کامیاب انعقاد پر خراج تحسین پیش کرتا ہوں۔
ایرک مائیر نے کہا کہ امید ہے کہ اس فورم کے انعقاد سے امریکا اور پاکستان کے تعلقات مزید مضبوط ہوں گے، ایرک مائیر نے توقع ظاہر کی کہ یہ فورم سرمایہ کاروں کے لیے یکساں مواقع فراہم کرے گا۔
انہوں نے کہا کہ امریکی صدر ڈونلڈ ٹرمپ نے بھی منرل اور معدنی وسائل کی اہمیت کو متعدد بار اجاگر کیا ہے، حالیہ دنوں میں پاکستان اور امریکا کے مابین کامیاب سرمایہ کاری کے کئی حوالے ہیں۔
ایرک مائیر کا کہنا تھا کہ دونوں ممالک کے مابین سویابین کی تجارت کا دوبارہ آغاز باعث مسرت ہے، 260 ہزار ٹن سویابین سے لدے چار جہاز حال ہی میں پاکستان پہنچے ہیں۔
انہوں نے کہا کہ یہ تجارتی روابط دونوں ممالک کے عوام کے مابین گہرے تعلقات کی نشاندہی کرتے ہیں ، متعدد پاکستانیوں نے امریکا میں ایکسچینج پروگرام کے تحت تعلیم حاصل کی ہے۔
ایرک مائیر نے کہا کہ یہ اقدامات پاکستانی اور امریکی عوام کے مابین گہرے رشتے کے عکاس ہیں۔