وفاقی وزیر خزانہ و سینیٹر محمد اورنگزیب سے اقتصادی تعاون تنظیم (ای سی او) کے سیکرٹری جنرل ڈاکٹر اسد مجید خان نے ملاقات کی ہے۔
وزارتِ خزانہ کے اعلامیے کے مطابق ملاقات میں دونوں رہنماؤں نے علاقائی اقتصادی تعاون بڑھانے سے متعلق بات چیت کی، اس موقع پر ای سی او رکن ممالک کے درمیان تجارت، معیشت اور سیاحت کو فروغ دینے کیلئے مختلف اقدامات پر تبادلہ خیال کیا گیا۔
ملاقات میں تجارتی راہداریوں اور ابھرتی ہوئی منڈیوں کے تناظر میں علاقائی تجارت اور روابط کی اہمیت پر زور دیا گیا، اس موقع پر رکن ممالک کے درمیان تعاون، علاقائی تجارت اور روابط کو مزید مستحکم کرنے کی ضرورت پر اتفاق کیا گیا۔
وزیر خزانہ محمد اورنگزیب نے علاقائی تجارت اور روابط کے ایجنڈے کو فروغ دینے کیلئے تعاون کا یقین دلایا۔
دونوں جانب سے تنظیم کے مختلف فورمز اور سرگرمیوں میں وزارتِ خزانہ کی نمائندگی کو مزید فعال بنانے پر بھی اتفاق کیا گیا۔