وزیر اعظم شہباز شریف کی خام چینی کی درآمد پر تشکیل کردہ کمیٹی کا اہم اجلاس ہوا۔
وفاقی وزیر برائے غذائی تحفظ رانا تنویر حسین کی زیر صدارت خام چینی کی درآمد پر اجلاس میں وزیر پٹرولیم علی پرویز ملک، وزیر صنعت ہارون اختر اور دیگر اعلیٰ حکام نے شرکت کی، خام چینی کی درآمد سے متعلق امور اجلاس میں زیر بحث آئے۔
وفاقی وزیر رانا تنویر حسین نے کہا کہ خام چینی کی درآمد ملکی سفید چینی کی قیمت مستحکم کرنے کے لیے مفید ثابت ہو سکتی ہے، کمیٹی نے خام چینی کی درآمد کے فوائد اور ممکنہ خدشات پر تفصیلی تبادلہ خیال کیا۔
رانا تنویر حسین نے کہا کہ مختلف ممالک کے ماڈلز کا تجزیہ کیا گیا، قیمتوں کے استحکام اور عوامی فائدے پر مشاورت کی گئی۔
وفاقی وزیر نے متعلقہ حکام کو ہدایت کی کہ خام چینی کی درآمد کے اثرات اور طریقہ کار پر جامع مطالعہ کیا جائے۔