کوئٹہ کی ضلعی انتظامیہ نے رمضان المبارک کے دوران 3 مقامات پر سستے بازار لگانے کا فیصلہ کر لیا۔
ڈپٹی کمشنر کوئٹہ لیفٹیننٹ (ر) سعد بن اسد کی زیر صدارت رمضان المبارک میں سستے بازار کا انعقاد اور اشیاء خورونوش کی قیمتوں کے تعین کے حوالے سے اجلاس منعقد ہوا۔
اجلاس میں فیصلہ کیا گیا کہ کوئٹہ میں 3 جگہوں پر سستے بازار لگائیں جائیں گے، مرکزی سستا بازار جوائنٹ روڈ پر لگے گا اسکے علاوہ نواں کلی اور میزان چوک پر بھی سستے بازار لگائے جائیں گے۔
اجلاس میں بڑا گوشت، مٹن، چینی، آٹا اور دودھ کی قیمتوں کا تعین کیا گیا جس کے تحت سستا بازار میں بڑا گوشت 1050روپے، مٹن 1900روپے فی کلو، چینی 130 روپے فی کلو، دودھ 170 روپے فی کلو اور20 کلو کے آٹے کا تھیلا 1460 روپے میں فروخت کیا جائیگا۔
اس کے علاوہ محکمہ زراعت کی جانب سے سستے بازار میں سبزی کے سٹال لگائے جائیں گے جہاں پر تازہ سبزیاں کم قیمت پر دستیاب ہوں گی۔