پاکستان میں فرانس کے سفیر نکولس گالے نے کونسل جنرل الیکسس چاٹاہتنِسکی کے ہمراہ پاکستان ایئرپورٹس اتھارٹی (پی اے اے) ہیڈ کوارٹرز کا دورہ کیا۔
پاکستان میں فرانس کے سفیر نکولس گالے نے پاکستان ایئر پورٹ اتھارٹی کی ترقیاتی کاوشوں کو سراہتے ہوئے پاکستان کے ایوی ایشن سیکٹر میں فرانس کے تعاون کے عزم کا اعادہ کیا۔
فرانسیسی سفیر کے دورے کے موقع پر ڈائریکٹر جنرل پی اے اے ایئر وائس مارشل ذیشان سعید اور سینئر حکام نے معزز مہمانوں کا خیر مقدم کیا، ڈائریکٹر جنرل پی اے اے نے فرانسیسی سفیر کو اتھارٹی کی تنظیمی ڈھانچے، اس کی جدیدیت کے منصوبوں اور مستقبل کی حکمت عملی پر بریفنگ دی۔
ملاقات میں ای گیٹ سسٹمز، جدید نیویگیشن ٹیکنالوجی اور بڑے ایئرپورٹس کی آؤٹ سورسنگ کے امور پر تبادلہ خیال ہوا جبکہ نئے گوادر انٹرنیشنل ایئرپورٹ کے فعال ہونے پر بھی گفتگو کی گئی۔
ڈائریکٹر جنرل پی اے اے ایئر وائس مارشل ذیشان سعید نے بین الاقوامی شراکت داری کی اہمیت پر زور دیا اور فرانسیسی کمپنیوں کے ساتھ تعاون کے امکانات پر روشنی ڈالی۔