پٹرول پمپس مالکان کی ہڑتال دو دن کیلئے مؤخر کر دی گئی

لاہور(شوریٰ نیوز)پٹرول پمپس مالکان کی ہڑتال دو دن کیلئے مؤخر کر دی گئی،وزیر مملکت پٹرولیم مصدق ملک کے مالکان سے مذاکرات میں پیش رفت، وزیر مملکت برائے پٹرولیم مصدق ملک کے پٹرول پمپس مالکان سے مذاکرات میں پیش رفت ہوئی ہے جس کے بعد پٹرول پمپس مالکان نے ہڑتال دو دن کیلئے مؤخر کر دی ہے۔پٹرولیم ڈیلرز ایسوسی ایشن کی جانب سے جاری بیان میں کہا گیا ہے کہ دو دن بعد پھر مذاکرات کا امکان ہے۔واضح رہے کہ کم شرح منافع کو جواز بنا کر پاکستان پٹرولیم ڈیلرز ایسوسی ایشن ( پی پی ڈی اے) نے 22 جولائی سے غیر معینہ مدت تک کے لیے پٹرول پمپس بند رکھنے کا اعلان کیا تھا۔ پاکستان پٹرولیم ڈیلرز ایسوسی ایشن کا کہنا تھا کہ موجودہ حکومت نے منافع کی شرح 2.40 فیصد رکھی جو نامنظور ہے، ایرانی اور سمگل شدہ پٹرول سے سیل 30 فیصد گر گئی ہے۔ ضلعی انتظامیہ نے بغیر ہیلمٹ پٹرول فروخت کرنے پر پابندی عائد کی جسے فوری ختم کیا جائے، پٹرول کی فروخت میں کمی سے مالی نقصان ہو رہا ہے جبکہ ملازمین کی تنخواہیں دینا بھی مشکل تر ہوتا جارہا ہے۔ تحفظات سے وزیر پٹرولیم کو آگاہ کیا لیکن کوئی جواب نہیں دیا گیا، ہمارے مطالبات منظور کیے جائیں ورنہ 22 جولائی سے پٹرول کی سپلائی معطل کر دی جائے گی اور پٹرول پمپس کو احتجاجاً مطالبات کی منظوری تک بند رکھا جائے گا۔پیٹرولیم ڈیلرز نے تحریری یقین دہانی کے بعد ہڑتال موخر کرنے کا فیصلہ کیا ہے، اور مشیر پیٹرولیم نے ڈیلرز کے مارجن پر نظر ثانی کرنے کے لیے کمیٹی بنا دی ہے، جو 48 گھنٹوں میں ڈیلرز کے مارجن کی ورکنگ بنا کر دے گی۔