اطلاعات کے مطابق غزہ کے مظلوم فلسطینیوں کے خلاف غاصب صیہونی حکومت کی جارحیت کا سلسلہ جاری ہے جس نے بے گناہ اور نہتھے فلسطینیوں سے ان کی زندگی بھی چھین لی ہے۔
غزہ سے یو این آئی کی رپورٹ کے مطابق غزہ پٹی پر ڈھائی ماہ سے زیادہ کا عرصہ گزرنے کے باوجود صیہونی حکومت کی بمباری جاری ہے اور اس عرصے میں صیہونی حکومت نے غزہ پر تقریباً 30 ہزار بم گرائے ہیں جس کے نتیجے میں 70 فیصد علاقہ مکمل طور پر تباہ ہو گیا ہے۔
وال اسٹریٹ جرنل کی رپورٹ کے مطابق دسمبر کے وسط تک صیہونی حکومت نے غزہ کی پٹی پر 29 ہزار بم گرائے جس کے نتیجے میں غزہ میں قائم 4 لاکھ 39 ہزار گھروں میں سے 70 فیصد عمارتیں اور گھر تباہ ہو گئے۔رپورٹ کے مطابق 4 لاکھ 39 ہزار میں سے 3 لاکھ سے زائد گھر تباہ ہو چکے ہیں۔
اطلاعات کے مطابق صیہونی بمباری سے صرف فلسطینیوں کے گھروں کو نقصان نہیں پہنچا بلکہ متعدد گرجا گھروں، تاریخی مساجد، شاپنگ مال، ہوٹل، تھیٹر اور اسکول بھی ملبے کا ڈھیر بن گئے۔ رپورٹ کے مطابق تباہ کن بمباری میں جن بجلی، پانی اور صحت کی تنصیبات کو نقصان پہنچاہے ان کی مرمت نہیں کی جاسکتی۔