فلسطینی مزاحمتی تحریک حماس کے عسکری ونگ القسام بریگیڈز کے ترجمان ابو عبیدہ نےکہا ہےکہ صیہونی حکومت اب بھی اپنے یرغمالیوں کی جانوں پر جوا کھیل رہی ہے اور ان کے گھر والوں کے جذبات کی پرواہ نہیں کر رہا۔
ایک بیان میں ابو عبیدہ کا کہنا تھا کہ صیہونی حکومت نے کل اپنے3 فوجیوں کو خود قتل کیا، اس نے انہیں رہا کروانے کے بجائے انہیں مارنے پر ترجیح دی، یہ ایک مجرمانہ فعل ہے جو کہ صیہونی حکومت نے ہماری قید میں موجود اپنے لوگوں کے خلاف جاری رکھا ہوا ہے۔
ابو عبیدہ کا کہنا تھا کہ صیہونی حکومت غزہ میں موجود اپنے یرغمالیوں کے بوجھ سے جان چھڑانے کی شدت سےکوشش کر رہا ہے۔
خیال رہےکہ صیہونی فوج کے ترجمان نے آج اعتراف کیا تھا کہ حماس کی قید میں موجود تین صیہونی شہری خود صیہونی فوج کے ہاتھوں فرینڈلی فائرنگ میں مارےگئے ہیں۔
ترجمان صیہونی فوج نے کہا کہ تینوں صیہونی مغوی قید سے فرار ہوئے اور اس دوران صیہونی فوج نے انہیں حماس کے ساتھی ہونےکے شبہ میں مار دیا۔
واقعےکے خلاف صیہونی حکومت میں احتجاجی مظاہرے شروع ہوگئے ہیں۔
دوسری جانب القسام کی جانب سے ‘وقت ختم ہو رہا ہے’ کے عنوان سے ایک ویڈیو بھی جاری کی گئی ہے جس میں غزہ میں صیہونی حملوں میں مارے جانے والے صیہونی یرغمالیوں کو دکھایا گیا ہے۔
فلسطینی مزاحمتی فورسز کے بھی غزہ کے مختلف علاقوں میں صیہونی فوج پر جوابی حملوں میں تیزی آگئی ہے۔
القسام اور القدس بریگیڈز نے مختلف کارروائیوں میں راکٹوں، مارٹرگولوں اور اسنائپر رائفلز سے حملے کرکے متعدد صیہونی فوجی ہلاک کر دیے۔