شام کے کنویں کا تیل امریکی فوجی 45 ٹینکروں میں بھر کر لے گئے

دمشق(شوریٰ نیوز) شام کے کنویں کا تیل امریکی فوجی 45 ٹینکروں میں بھر کر لے گئے، امریکی فوجی ہر روز شام سے 70 ہزار بیرل تیل چوری کرکے عراق پہنچاتے ہیں،تفصیلات کے مطابقسانا کی رپورٹ کے مطابق شام کے شمال مشرق کے مقامی ذرائع کا کہنا ہے کہ اتوار کے روز شام کے الیعربی کے علاقے کے کنویں سے نکالے گئے تیل کو امریکی فوجی 45 ٹینکروں میں بھر کر غیر قانونی گذر گاہ المحمودیہ سے عراق لے گئے ہیں۔چند روز قبل بھی امریکی فوج نے شام سے 43 ٹینکروں میں تیل بھر کے عراق پہنچایا تھا۔شام کی وزارت پٹرولیئم کے مطابق، امریکی فوجی اپنے کرائے کے فوجیوں کے ساتھ ہر روز شام سے 70 ہزار بیرل تیل چوری کرکے عراق پہنچاتے ہیں۔غاصب امریکی فوج کا دعویٰ ہے کہ وہ عالمی اتحاد کے دائرے میں دہشت گردوں کے خلاف برسر پیکار ہے جبکہ وہ، کرد ڈیموکریٹک فورس کے ساتھ مل کر تیل کی لوٹ مار کی غرض سے شام کی آئل فیلڈ پر قبضہ کئے ہوئے ہے اور اسی غرض سے گزشتہ چند ماہ کے دوران جنگی ساز و سامان کے ساتھ بڑی تعداد میں امریکی فوجی شام کے تیل سے مالامال ان علاقوں میں پہنچائے گئے ہیں۔دہشت گردی کے خلاف مہم کے بہانے امریکہ اور اس کے اتحادیوں کی غیر قانونی فوجی موجودگی، ایسی حالت میں جاری ہے کہ امریکی صدر ٹرمپ نے اپنی حکومت کے آغاز میں ہی اعلان کیا تھا کہ امریکہ ہی شام میں مختلف دہشت گرد گروہ منجملہ داعش کے قیام کا باعث بنا ہے۔