آئی ایس او ماہِ صیام کا دوسرا عشرہ ’’قرآن وامامت‘‘ کے عنوان سے منائے گی

امامیہ سٹوڈنٹس آرگنائزیشن پاکستان ماہِ صیام کے دوسرے عشرے کو ’’عشرہ قرآن و امامت‘‘ کے عنوان سے منائے گی۔ آئی ایس او پاکستان کے مرکزی نائب صدر تنصیر حیدر کے مطابق 15 رمضان المبارک کو ولادت حضرت امام حسن علیہ السلام کے موقع پر ڈویژنز اور یونٹس کی سطح پر جشن جبکہ 21 رمضان المبارک یوم شہادت حضرت امام علی علیہ السلام کی مناسبت سے مجالس عزاء کا اہتمام کیا جائے گا۔ انہوں نے ملک بھر میں موجود امامیہ سکاوٹس کو ہدایت کی کہ وہ یوم علی علیہ السلام پر برآمد ہونیوالے جلوس ہائے عزاء اور مجالس عزاء کی سکیورٹی کے فرائض تندہی سے سرانجام دیں۔

لاہور میں کارکنوں سے خطاب میں تنصیر حیدر کا مزید کہنا تھا کہ ماہ صیام کے دوسرے عشرے میں قرآن کے تمسک کیلئے خصوصی محافل کا اہتمام کیا جائے گا۔ یونٹس میں خصوصی دروس ہوں گے، جن میں علمائے کرام قرآن و امامت کے موضوع پر نوجوانوں کی فکری تربیت کریں گے اور نوجوانوں کو قرآن سے اپنا تعلق مضبوط کرنے کی ترغیب دی جائے گی۔ انہوں نے کہا کہ قرآن کتاب ہدایت ہے، جس سے روشنی لے کر دنیاوی و آخروی زندگی میں کامیابی حاصل کی جا سکتی ہے۔