لاہور، علامہ راجہ ناصر عباس جعفری کی مزار بی بی پاکدامنؒ حاضری، فاتحہ خوانی کی

مجلس وحدت مسلمین پاکستان کے سربراہ علامہ راجہ ناصر عباس جعفری نے لاہور میں حضرت بی بی پاک دامنؒ کے دربار پر حاضری دی، فاتحہ خوانی کی اور دربار میں جاری تعمیراتی کام کا جائزہ لیا۔ علامہ راجہ ناصر عباس جعفری نے مرحوم سیٹھ بشارت علی کے وقف کردہ زیر تعمیر مسافر خانے پر دعائے خیر بھی کی۔ اس موقع پر مرکزی سیکرٹری سیاسیات اسد عباس نقوی، صوبائی سیکرٹری سیاسیات سید حسن کاظمی، سیٹھ عدنان علی اور شیخ عمران بھی ہمراہ تھے۔ علامہ راجہ ناصر عباس سے زائرین نے بھی ملاقات کی اور اپنی مشکلات سے آگاہ کیا۔ زائرین کا کہنا تھا کہ ایک طویل عرصے سے تعمیراتی کام کا بہانہ بنا کر مزار کو بند رکھا گیا ہے، جبکہ ملک بھر سے آنیوالے زائرین کو مزار کی بندش سے مشکلات ہیں۔ زائرین کی شکایات پر علامہ راجہ ناصر عباس نے محکمہ اوقاف کے حکام کو کام کی رفتار تیز کرنے کی ہدایت کی۔ انہوں نے کہا کہ اس حوالے سے دیکھیں گے کہ کہیں تعصب کا مظاہرہ تو نہیں کیا جا رہا، اگر اس معاملے میں کوئی سازش نظر آئی تو محکمہ اوقاف کی ذمہ داروں کیخلاف ایکش لیا جائے گا اور حکومت کو ان کی شکایت کی جائے گی۔