علامہ سید احمد اقبال رضوی ایم ڈبلیو ایم کے مرکزی وائس چیئرمین نامزد

مجلس وحدت مسلمین پاکستان کے چیئرمین علامہ راجہ ناصر عباس جعفری نے علامہ سید احمد اقبال رضوی کو ایم ڈبلیو ایم کا وائس چیئرمین نامزد کر دیا ہے۔ اس سلسلے میں مرکزی قیادت کی طرف سے نوٹیفکیشن جاری کر دیا گیا۔ مجلس وحدت مسلمین کے مرکزی و صوبائی عہدیداروں نے اس فیصلے کو تنظیم کی ترقی و استحکام کے لیے مثبت پیش رفت اور لائق تحسین قرار دیا ہے۔ دریں اثناء علامہ سید احمد اقبال نے ایک بیان میں پٹرول کی قیمتوں میں اضافے پر تشویش کا اظہار کرتے ہوئے کہا ہے کہ ایک ہفتے میں دوسری مرتبہ پٹرول کی قیمتوں میں 60 روپے تک اضافہ عوام پر ظلم کے مترادف ہے، امپورٹڈ ایجنڈے پر کام کرنے والی امپورٹڈ حکومت کو عوامی مفاد سے کوئی دلچسپی نہیں۔ ہر روز عوام پر مہنگائی کے بم گرائے جا رہے ہیں۔

ان کا کہنا تھا کہ اشیائے خورد و نوش کی قیمتوں میں صبح و شام کے لحاظ سے اضافہ ہو رہا ہے، ایک ہی دن میں بجلی اور پٹرول کی قیمتوں میں اضافے سے مہنگائی کا طوفان آئے گا۔ بجلی کی لوڈشیڈنگ سے کاروبار زندگی ٹھپ ہو کر رہ گیا ہے، مہنگائی اور غربت و افلاس کے سبب غریب عوام آج دو وقت کی روٹی کے لئے پریشان ہیں۔ انہوں نے مزید کہا کہ مہنگائی کیخلاف لانگ مارچ کرنیوالوں نے عوام کو آئی ایم ایف کے خونخوار پنچوں میں دے دیا ہے۔ آئی ایم ایف انسان دشمن اور عوام دشمن سامراجی ادارہ ہے، آئی ایم ایف ملکوں کی معیشت درست کرنے کی بجائے ملکوں کی معیشت کی بربادی کا سبب ہے۔ اپنے کپڑے بیچ کر عوام کو سستا آٹا دینے کے شوشے چھوڑنے والے اپنے اور زرداری کے بیروں ملک اثاثے واپس لا کر عوام کو ریلیف دیں۔