ہیکرز نے مشرقی افریقی ملک یوگنڈا کے مرکزی بینک کو ایک کروڑ 70 لاکھ ڈالر کا چونا لگا دیا۔غیر ملکی ذرائع ابلاغ کے مطابق ہیکرز نے بینک آف یوگنڈا کے آئی ٹی سسٹمز تک رسائی حاصل کرکے یہ رقم دوسرے اکاؤنٹ میں منتقل کرلی۔
رپورٹس کے مطابق جنوب مشرقی ایشیا میں واقع ہیکنگ گروپ نے چوری کی رقم کا کچھ حصہ جاپان منتقل کردیا۔
غیر ملکی میڈیا کا کہنا ہے کہ بینک چوری شدہ رقم کا آدھا حصہ ریکور کرنے میں کامیاب ہو گیا ہے جبکہ یوگنڈا کے صدر یویری موسیوینی کے حکم پر سائبر حملے سے متعلق مزید تحقیقات شروع کردی گئی ہیں۔
اس سے قبل پاکستان میں پنڈی بھٹیاں کے علاقے میں ہیکرز اے ٹی ایم سے 58لاکھ سے زائد رقم لے اڑے تھے۔
بینک ذرائع نے بتایا کہ ہیکرز نے ڈیوائس سے 5 ہزار والے نوٹوں کے ٹرے کو ہیک کیا، ڈیوائس کا رابطہ منقطع ہوا تو اے ٹی ایم خود کار طریقے سے بندہوگئی۔
ذرائع نے بتایا کہ ہیڈآفس سے الرٹ بھی جاری ہوا، بینک کا گارڈ مشین تک پہنچا لیکن مشین خالی ملی، واقعے کا مقدمہ درج کروادیا گیاہے۔