گوگل جیمنائی کے 2 ایسے فیچرز صارفین کو مفت دستیاب جن کیلئے پہلے ماہانہ ہزاروں روپے ادا کرنے پڑے تھے

گوگل نے اپنے آرٹی فیشل انٹیلی جنس (اے آئی) ماڈل جیمنائی کے 2 ایسے فیچرز تمام صارفین کے لیے متعارف کرا دیے ہیں جو اب تک ماہانہ 20 ڈالرز (ساڑھے 5 ہزار پاکستانی روپے سے زائد) ادا کرنے والے افراد کو دستیاب تھے۔

گوگل نے جیمنائی لائیو ویڈیو اور اسکرین شیئرنگ فیچرز کو تمام اینڈرائیڈ صارفین کے لیے مفت متعارف کرا دیے ہیں۔

یہ فیچرز کچھ ہفتے پہلے متعارف کرائے گئے تھے مگر ان تک رسائی محض گوگل ون اے آئی پریمیئم پلان کے صارفین کو جیمنائی ایپ کے ذریعے دستیاب تھی۔

اب گوگل نے اعلان کیا ہے کہ صارفین کے بہترین فیڈبیک کے بعد ان فیچرز کو مزید افراد کے لیے متعارف کرایا جا رہا ہے۔

جیمنائی لائیو ویڈیو اور اسکرین شیئرنگ سے آپ اسکرین پر موجود کسی بھی چیز یا آپ کے سامنے موجود چیز کے بارے میں جیمنائی سے پوچھ سکتے ہیں۔

مثال کے طور پر آپ کسی لباس کی تصویر کھینچتے ہیں تو آپ اس کے میٹریل کے بارے میں تفصیلات حاصل کرسکتے ہیں۔

اسی طرح آپ انٹرنیٹ پر موجود کسی چیز جیسے لفظ یا کہانی کے بارے میں بھی پوچھ سکتے ہیں جن کو آپ نے پہلے کبھی نہیں سنا ہوتا۔

گوگل کی جانب سے ان ٹولز کو آنے والے ہفتوں میں تمام اینڈرائیڈ صارفین کے لیے متعارف کرایا جائے گا۔

یہ فیچرز ان تمام اینڈرائیڈ فونز پر دستیاب ہوں گے جن میں جیمنائی ایپ کام کرسکتی ہے۔

گوگل کے ایک ترجمان کے مطابق 2 جی بی یا اس سے زائد ریم اور اینڈرائیڈ 10 یا اس سے اوپر کے آپریٹنگ سسٹمز پر کام کرنے والے فونز پر یہ فیچرز صارفین استعمال کرسکیں گے۔