امریکی فوج کی افغانستان سے شرمناک واپسی اور عبرتناک شکست پرنو منتخب امریکی صدر ڈونلڈ ٹرمپ کی جانب سے ذمہ دار فوجی افسران کا کورٹ مارشل کرنے کا امکان ہے۔
اس حوالے سے غیر ملکی خبر رساں ادارے کی رپورٹ کے مطابق ڈونلڈ ٹرمپ کی عبوری ٹیم مبینہ طور پر 2021میں افغانستان سے انخلا میں ملوث سینئر فوجی افسران کے خلاف کورٹ مارشل کرنے کے امکان پر غور کر رہی ہے۔
رپورٹ میں کہا گیا ہے کہ امریکی فوج کے ان افسران کی فہرست مرتب کی جارہی ہے جو افغانستان سے افراتفری کے عالم میں انخلا میں براہ راست ملوث تھے۔
ترک نیوز ایجنسی ’انادولو‘ نے امریکی نشریاتی ادارے ’این بی سی نیوز‘ کے حوالے سے بتایا ہے کہ ڈونلڈ ٹرمپ کی ٹیم 2021 میں افغانستان سے انخلا کی تحقیقات کرنے کے لیے ایک کمیشن تشکیل دینے کے امکان کا جائزہ لے رہی ہے۔
این بی سی نیوز نے ذرائع کے حوالے سے بتایا کہ یہ معاملہ ان کے لیے انتہائی سنجیدہ ہے اور بتایا کہ میٹ فلین جو منشیات کے خلاف اقدامات اور عالمی خطرات کے لیے دفاعی امور کے سابق نائب معاون وزیر ہیں اس اقدام کی سربراہی کررہے ہیں۔
ذرائع کے مطابق اس اقدام کا مقصد فیصلہ سازی میں براہ راست شامل لوگوں کی شناخت کرنا، انخلاء کے طریقہ کار کا جائزہ لینا اور فوجی افسران پر غداری اور اس کے علاوہ دیگر الزامات عائد کرنا ہے۔
یاد رہے کہ 20 سال بعد2021میں امریکی فوج افغانستان سے جس حال میں نکلی اس پر اسے شدید تنقید کا نشانہ بنایا گیا جس میں کابل کے ہوائی اڈے سے آخری امریکی فوجی کی واپسی کی یادگار تصویر اور مایوسی کے دیگر مناظر بھی شامل ہیں۔