ایمبولینس کو راستہ نہ دینے پر پولیس نے کار ڈرائیور پر ڈھائی لاکھ روپے کا جرمانہ عائد کرتے ہوئے اسکا ڈرائیونگ لائسنس منسوخ کردیا۔
سوشل میڈیا پر بھارتی ریاست کیرالہ سے ایک ویڈیو وائرل ہوئی تھی جس میں دیکھا گیا تھا کہ ایک ایمبولینس کار کے پیچھے موجود ہے، تاہم کار ڈرائیور اسے جان بوجھ کر راستہ دینے سے گریزاں ہے، صاف لگ رہا تھا کہ ڈرائیور نے ایمبولینس کے آگے نکلنے میں رکاوٹ بننے کی کوشش کی۔
مذکورہ واقعہ 7 نومبر کو چلاکوڈے میں پیش آیا، جس میں کار ڈرائیور نے مبینہ طور پر ایمرجنسی وہیکل کو راستہ دینے سے گریز کیا جو کہ اس کا حق تھا، ایمبولینس اس وقت تھریسور میڈیکل کالج جارہی تھی۔
ایمبولینس میں موجود پیرامیڈیکس نے ڈیش کیم سے اس واقعے کو ریکارڈ کرلیا، جس میں دیکھا گیا کہ ایک دو رویہ سڑک پر تقریباً 2 منٹ تک ایمبولینس سلور رنگ کے کار کے پیچھے رہی مگر ڈرائیور نے اسے راستہ نہ دیا۔
بار بار ایمبولینس کی جانب سے سائرن بجانے کے باوجود کار ڈرائیور کے کان پر جوں تک نہ رینگی بلکہ صاف ظاہر ہورہا تھا کہ کار ڈرائیور جان بوجھ کر ایمبولینس کو نکلنے کا راستہ نہیں دے رہا۔
بھارتی ریاست کیرالا کی پولیس نے تھریسور سے تعلق رکھنے والے ڈرائیور کے اس اقدام پر نہ صرف اس پر بھاری جرمانہ عائد کیا بلکہ اس کا لائسنس بھی منسوخ کردیا ہے۔