گاندربل: مقبوضہ کشمیر کے ضلع گاندربل میں مسلح افراد کے حملے میں ڈاکٹر سمیت 7 مزدور ہلاک اور 5 زخمی ہو گئے ہیں۔
کشمیر میڈیا سروس کے مطابق غیر قانونی طورپر بھارت کے زیر قبضہ جموں و کشمیر کے ضلع گاندربل میں اتوار کی شام نامعلوم مسلح افراد کے حملے میں ایک ڈاکٹر سمیت 7 افراد ہلاک اور 5 زخمی ہو گئے۔
نامعلوم مسلح افراد نے اتوار کی شام سرینگر لہہ ہائی وے پر گگنگیر میں زیڈ موڑ سرنگ کے قریب ایک بھارتی تعمیراتی کمپنی کے کیمپ پر حملہ کیا، ہلاک ہونے والوں کی شناخت بڈگام کے ڈاکٹر شاہنواز قادر ڈار اور ضلع جموںکے انیل کمار شکلا، فہیم نذیر اور ششی ابرول کے ناموں سے ہوئی ہے، جب کہ گرمیت سنگھ، محمد حنیف اور محمد کلیم بھارت کے رہائشی تھے۔
انسپکٹر جنرل آف پولیس کشمیر ودھی کمار بردی نے صحافیوں کو بتایا کہ گگنگیر میں ہوئے حملے میں ابتدائی طور پر تین افراد کی موت ہوئی جب کہ چار دیگر اس وقت دم توڑ گئے جب انھیں اسپتال منتقل کیا جا رہا تھا۔
پولیس حکام کے مطابق مسلح افراد نے کیمپ پر فائرنگ کی تھی جس میں زیڈ موڑ سرنگ کی تعمیر میں مصروف ایک کمپنی کے کارکن مقیم تھے، بھارتی فوجیوں نے ضلع کے سونمرگ اور دیگر علاقوں میں بڑے پیمانے پر سرچ آپریشن شروع کر دیا ہے۔
بھارتی میڈیا کے مطابق وزیر اعلیٰ مقبوضہ کشمیر عمر عبداللّٰہ نے ضلع گاندربل میں حملے کی شدید مذمت کی ہے، جاری کیے گئے بیان میں ان کا کہنا تھا کہ گاندربل میں مزدوروں پر حملہ انتہائی افسوس ناک ہے۔