شاہنواز بھٹو شہید پرعزم شخصیت کے مالک تھے، فریال تالپور

اسلام آباد (شوریٰ نیوز) پاکستان پیپلز پارٹی شعبہ خواتین کی مرکزی صدر اور رکنِ سندھ اسمبلی فریال تالپور نے شہید شاہنواز بھٹو کو ان کے 38 ویں یومِ شہادت پر خراج عقیدت پیش کیا ہے۔ فریال تالپور نے اپنے بیان میں کہا کہ شاہنواز بھٹو شہید ایک جمہوریت پسند رہنما اور بھادر و پرعزم شخصیت کے مالک تھے۔ انہوں نے کہا کہ بھٹو خاندان کے دیگر افراد کی طرح شاہنواز بھٹو شہید سے بھی آمر ضیا خوفزدہ تھا، جس وجہ سے ایک گہنونی سازش کے تحت شاہنواز بھٹو کو شہید کیا گیا۔ فریال تالپور کا کہنا تھا کہ پاکستانی عوام کے حقوق اور جمہوریت کے لیے بھٹو خاندان کی جدوجہد اور قربانیاں بے مثال و لازوال ہیں۔ انہوں نے کہا کہ ملک میں آج جمہوریت پاکستان پیپلز پارٹی کی قیادت اور جیالوں کی جدوجہد اور قربانیوں کا ثمر ہے۔ فریال تالپور نے کہا کہ شہید شاہنواز بھٹو کو خراج عقیدت پیش کرنے کا بھتر نمونہ یہ ہے کہ ہمیں آج یہ تجدید عہد کرنا چاہیے کہ ہم قائدِ عوام شہید ذوالفقار علی بھٹو کے نظریے اور شہید محترمہ بینظیر بھٹو کے فلسفے کی روشنی میں آئین و پارلیمان کی بالادستی، جمہوریت کی مضبوطی، عوام کی خوشحالی اور پاکستان کی سلامتی کے لیے اپنا بھرپور کردار ادا کریں گے