آئی سی سی چیمپئنزٹرافی کے بعد ایک اور کرکٹ ایونٹ کا شیڈول سامنے آگیا، جس میں پاکستان اور بھارت کی ٹیمیں بھی ٹکرائیں گی۔
میڈیا رپورٹس کے مطابق منتظمین کی جان ب سے ورلڈ چیمپئین شپ آف لیجنڈز لیگ کے دوسرے سیزن کے شیڈول کا اعلان کیا گیا، دوسرے سیزن میں پاکستان اور بھارت کے علاوہ انگلینڈ، آسٹریلیا اور جنوبی افریقا کی لیجنڈز کی ٹیمیں جلوہ گر ہوں گی۔
لیجنڈ کرکٹرز ایک بار پھر اپنی کرکٹ سے شائقین کو محظوظ کریں گے، تمام سابق کھلاڑیوں کو شائقین 18 جولائی سے 2 اگست 2025 تک انگلینڈ میں ایکشن میں دیکھ سکیں گے۔
18 جولائی کو انگلینڈ اور پاکستان چیمپئینز کے درمیان ٹورنامنٹ کا افتتاحی میچ ہو گا جبکہ روایتی حریف پاکستان اور بھارت کی ٹیمیں 20 جولائی کو مدمقابل آئیں گی۔
پاک بھارت مقابلہ جس کا شائقین کو انتظار رہتا ہے اسے ایجبسٹن میں شیڈول کیا گیا ہے، ایونٹ 2 سیمی فائنلز 31 جولائی کو اور فائنل بھی 2 اگست کو ایجبسٹن میں کھیلا جائے گا۔
خیال رہے کہ ایونٹ کا پہلا سیزن میں بھارتی ٹیم کے نام رہا تھا، پاکستان چیمپئینز کی ٹیم کو فائنل میچ میں 5 وکٹوں شکست ہوئی تھی۔
ورلڈ چیمپئین شپ آف لیجنڈز لیگ کے سی ای او ہرشیت تومر نے بتایا کہ پہلے سیزن میں مداحوں کا جُوش و خروش ناقابل تھا اسی لیے ہم نے دوسرے سیزن کی تیاریاں کیں۔
ٹورنامنٹ کے شریک مالک اور بالی ووڈ اسٹار اجے دیوگن نے کہا کہ ہمیں یقین ہے کہ دوسرا سیزن شائقین کرکٹ کیلئے مزید پروقار ہوگا اور پہلے کے مقابلے زیادہ دلچسپ مقابلے دیکھنے کو ملیں گے۔