دہلی ، دریائے جمنا 45 سال کی بلند ترین سطح پر ، شہریوں کی نقل مکانی

دہلی(شوریٰ نیوز) دریائے جمنا 45 سال کی بلند ترین سطح پر ، شہریوں کی نقل مکانی،دریائے جمنا میں پانی کی سطح کا 207.08 میٹر تک پہنچنا ،خطر ہ کی علامت۔ ملک میں مون سون کا سیزن جاری ہے اور شمالی ریاستوں میں ہونے والی موسلادھار بارشوں سے دریائے جمنا میں پانی کی سطح میں خطرناک حد تاک اضافہ ہوگیا ہے جو 45 سال کے دوران سب سے اونچی سطح ہے۔ آج صبح تک دریائے جمنا میں پانی کی سطح 207.08 میٹر تک پہنچ گئی جسے انتہائی خطرناک کہا جارہا ہے جب کہ دریا میں مسلسل بڑھتے ہوئے پانی نے سیلابی صورتحال پیدا کررکھی ہے جس سے رہائشی عمارتوں اور مارکیٹوں کو بھی شدیدنقصان پہنچا ہے۔بھارت کے سینٹرل واٹر کمیشن کے مطابق 1978 میں دریائے جمنا میں پانی کی سطح 207.49 میٹر تک ریکارڈ کی گئی تھی جب کہ بدھ کی صبح پرانے پل پر پانی کی سطح 207.38 میٹر ریکارڈ کی گئی ہے جو اب تک کی سب سے بلند سطح ہے۔ دریائے جمنا میں پانی کی بلند ہوتی انتہائی خطرناک سطح سے پرانی دہلی میں سیلاب کا شدید خطرہ ہے جہاں پہلے ہی اورنج الرٹ نافذ ہے جس کے باعث انتظامیہ نے ایسے علاقوں سے شہریوں کی محفوظ مقامات پر منتقلی شروع کردی ہے جب کہ اولڈ ریور برج سے ٹریفک اور ٹرینوں کی آمدورفت بھی معطل کردی گئی ہے۔ ریاست اتراکھنڈ اور ہماچل پردیش میں موسلادھار بارش کی وجہ سے دریا کے پانی کی سطح میں اضافے کے بعد متھرا میں جمنا ندی کے کنارے واقع پولیس اسٹیشنوں کو الرٹ پر رکھا گیا ہے۔
دریا کے قریب بسنے والی آبادیوں سے لوگوں کو نکال کر ان کو محفوظ مقامات پر منتقل کرنے کا سلسلہ جاری ہے۔