نیپال، ہیلی کاپٹر ماؤنٹ ایورسٹ کے قریب گر کر تباہ، 5 افراد ہلاک

کھٹمنڈو(شوریٰ نیوز)نیپال، ہیلی کاپٹر ماؤنٹ ایورسٹ کے قریب گر کر تباہ، 5 افراد ہلاک،اڑان کے کچھ دیر بعد ہیلی کاپٹر کا رابطہ کنٹرول ٹاور سے منقطع ہوگیا تھا،نیپال میں مسافر بردار ہیلی کاپٹر ماؤنٹ ایورسٹ کے قریب پہاڑی سلسلے سولکھمبو میں زمین بوس ہوگیا ، مسافر بردار ہیلی کاپٹر NA-MV نے سورکے ہوائی اڈے سے کھٹمنڈو کے لیے پرواز بھری تھی لیکن اڑان کے کچھ ہی دیر بعد ہیلی کاپٹر کا رابطہ کنٹرول ٹاور سے منقطع ہوگیا تھا۔لاپتا ہیلی کاپٹر کی تلاش میں گئے سرچ آپریشن ٹیم کو ہیلی کاپٹر کا ملبہ پہاڑی سلسلے سولکھمبو کے ضلع لامجورا سے مل گیا۔ ہیلی کاپٹر میں 6 افراد سوار تھے لیکن ملبے سے 5 لاشیں نکالی گئیں۔ ایک لاپتا ہے۔بعد ازاں لاپتا شخص کی لاش بھی ایک کھائی سے مل گئی۔ حادثے میں ہلاک ہونے والوں میں سے 5 کا تعلق میکسیکو سے تھا۔ لاشوں کی شناخت کا عمل جاری ہے۔حادثے کی وجہ کا تعین نہیں ہوسکا لیکن پولیس کا کہنا ہے کہ ہیلی کاپٹر مبینہ طور پر پہاڑی کی چوٹی پر ایک درخت سے ٹکرا گیا جس کی وجہ سے یہ حادثہ پیش آیا تاہم ابھی تفتیش ابتدائی مرحلے میں ہے۔ایوی ایشن نے ہیلی کاپٹر حادثے کی تحقیقات کے لیے انکوائری کمیٹی تشکیل دیدی ہے۔