اسلام آباد (شوریٰ نیوز)وفاقی وزیر آبی وسائل سید خورشید شاہ نے کہا ہے کہ ڈیمز تنازع پر شکست بھارت کی ہٹ دھرمی کا ثبوت ہے،
عالمی ثالثی عدالت میں پاکستانی مؤقف کی قبولیت کامیابی ہے۔ فلڈ منیجمنٹ کیلئے تمام اسٹیک ہولڈرز کے ساتھ مل کر جامع پالیسی بنائی جا رہی ہے تاکہ سیلابی نقصانات کی روک تھام کا مستقل حل نکالا جا سکے۔کشن گنگا ڈیم تنازع: پاکستان کی عالمی ثالثی عدالت میں بھارت کیخلاف کامیابی، مقبوضہ کشمیر کشن گنگا ڈیم کے تنازع پر عالمی ثالثی عدالت نے بھارت کا پرماننٹ کورٹ آف آربیٹریشن کے دائرہ اختیار پر اعتراض مسترد کرتے ہوئے کشن گنگا ڈیم پرپاکستان کا کیس قابل سماعت قرار دے دیاہے۔ 19 مئی 2018 کو پاکستان کے شدید احتجاج کے باوجود بھارتی وزیراعظم نریندر مودی نے مقبوضہ کشمیر میں 330 میگا واٹ بجلی کی پیداواری صلاحیت کے حامل متنازع کشن گنگا ہائیڈرو پاور پلانٹ کا افتتاح کیا تھا۔پاکستان کا اس متنازع منصوبے کے حوالے سے مؤقف ہے کہ یہ منصوبہ سندھ طاس معاہدے کی خلاف ورزی ہے، عالمی بینک نے کشن گنگا منصوبے پر پاکستان اور بھارت کے درمیان دو مرتبہ مذاکرات کرائے تاہم اس کا کوئی نتیجہ نہیں نکلا۔