بھارت کی ریاست مہاراشٹرا کے ضلع جلگاؤں میں ایک حاملہ خاتون کو اسپتال منتقل کرنے کے دوران ایمبولینس کا آکسیجن سلنڈر پھٹ گیا۔بھارتی میڈیا رپورٹس کے مطابق حادثے کی ویڈیو سوشل میڈیا پر وائرل ہوگئی، جس میں دیکھا جاسکتا ہے کہ ایمبولینس میں آگ لگی ہوئی ہے اور شعلے کئی فٹ بلندی تک بلند ہورہے ہیں۔
آکسیجن سلنڈر پھٹنے کا دھماکہ اتنا شدید تھا کہ قریب کے کچھ گھروں کی کھڑکیاں بھی ٹوٹ گئیں۔حادثے سے قبل ایمبولینس ڈرائیور نے ہوشیاری کا مظاہرہ کرتے ہوئے انجن سے دھواں نکلتے دیکھا تو فوری طور پر ایمبولینس روک دی اور گاڑی سے اتر کر دور چلا گیا۔
ڈرائیور نے حاملہ خاتون اور تیمارداروں کو بھی فوری طور پر ایمبولینس سے نیچے اتار دیا تھا، جیسے ہی تمام افراد ایمبولینس سے دور ہوئے آکسیجن سلنڈر دھماکے سے پھٹ پڑا۔ بروقت ایمبولینس سے اترنے کے باعث کوئی جانی نقصان نہیں ہوا۔
اس سے قبل بھارت میں حیدرآباد کے پرانے شہر میں بے رحم شوہر نے بیوی کو قتل کرنے کے بعد لاش کو آگ لگادی۔بھارتی میڈیا رپورٹس کے مطابق بنڈلہ گوڑہ ہاشم آباد کے فیاض قریشی (25) سال اور قمر بیگم (23) کی شادی کو چند سال ہی ہوئے تھے۔
شوہر اپنی بیوی پر شک کرتا تھا، جس کے باعث اکثر دونوں میں لڑائی جھگڑا رہتا تھا، گزشتہ روز دونوں کے درمیان اسی بات پر لڑائی ہوئی، شوہر نے طیش میں آکر خنجر سے بیوی کو قتل کردیا اس کے بعد پیٹرول چھڑک کر لاش کو بھی جلا ڈالا۔پولیس کا اس حوالے سے کہنا ہے کہ شوہر کے خلاف قتل کا مقدمہ درج کرکے ملزم کی تلاش شروع کردی گئی ہے۔