لاہور، فائرنگ سے 4و شہری جان کی بازی ہا گئے، 1ملزم زخمی حالت میں گرفتار
بند روڈ تھانہ شیراکوٹ کی حدود میں بابو صابو ٹرک اڈہ کے قریب مسلح افراد کی فائرنگ سے دو شہری ہلاک ہوگئے جبکہ ملزم کو موقع سے زخمی حالت میں گرفتار کر لیا گیا۔
پولیس کے مطابق فائرنگ کا واقعہ دو پارٹیوں میں جھگڑے کے باعث پیش آیا، جاں بحق ہونے والے افراد کی شناخت عامر اور شمشیر کے نام سے ہوئی ہے جبکہ پولیس نے موقع پر پہنچ کر جائے وقوعہ سے آفاق نامی ایک ملزم کو گرفتار کر لیا جس کے قبضے سے دو پسٹل بھی برآمد کیے گئے۔
پولیس کا کہنا ہے کہ گرفتار ملزم آفاق اپنے دوستوں شمشیر اور ذوہیب کے ہمراہ شیخوپورہ سے آیا تھا تینوں ملزمان نے فائرنگ کر کے عامر کو قتل کیا جبکہ ملزموں کی اپنی ہی فائرنگ سے ان کا ساتھی شمشیر بھی مارا گیا۔
پولیس موقع پر پہنچ گئی اور مزید تحقیقات کی جا رہی ہیں،ڈی آئی جی آپریشز فیصل کامران نے واقعہ کا نوٹس لیتے ہوئے ایس پی اقبال ٹاؤن سے واقعہ کی رپورٹ طلب کر لی۔
ترجمان ڈی آئی جی آپریشنز کے مطابق مقتول عامر نوانکوٹ کا رہائشی تھا اور بابو صابو ٹرک اڈہ پر مکینک تھا جبکہ ملزمان آفاق، زوہیب اور شمشیر شیخوپورہ کے رہائشی ہیں جنہوں نے سابقہ فیملی جھگڑے کی بنا پر عامر نامی مکینک پر حملہ کر کے قتل کیا ہے۔
دوسرے واقعہ میںلاہور میں داماد نے ساس اور سسر کو فائرنگ کر کے قتل کر دیا۔ پولیس کا کہنا ہے کہ جاں بحق میاں بیوی کی شناخت شیعان اور شبانہ کے نام سے ہوئی۔
داماد فیصل نے گھریلو جھگڑے پر فائرنگ کی۔ فیصل بیوی سے ناراضی پر صلح کرنے گھر آیا تھا لیکن صلح کے بجائے اس نے فائرنگ کر دی۔
پولیس نے دو ملزمان کو حراست میں لے لیا جبکہ مرکزی ملزم واقعے کے بعد فرار ہو گیا۔ پولیس کا کہنا ہے کہ مرکزی ملزم کی گرفتاری کے لئے چھاپے مارے جارہے ہیں ، جلد اسے گرفتار کر لیں گے۔