نیو جرسی(شوریٰ نیوز)امریکا میں پہلی مسلمان خاتون کو وفاقی جج مقرر ہو گئیں،امریکی سینیٹ نے بنگلہ دیشی نژاد امریکی خاتون نصرت جہاں کی توثیق کردی ،جس کے بعد وہ امریکا میں پہلی مسلمان خاتون وفاقی جج بن گئیں۔ سینیٹ کے اکثریتی رہنما چک شومر نے ایک ٹوئٹ میں کہا کہ ’امریکی سینیٹ نے بنگلہ دیشی نژاد امریکی خاتون کی توثیق کردی ہے جو امریکا کی پہلی مسلمان خاتون وفاقی جج ہوں گی‘ نصرت جہاں نیو یارک کے مشرقی ضلع میں امریکی ڈسٹرکٹ جج ہوں گی، وہ امریکن سول لبرٹیز یونین (اے سی ایل یو) کی لیگل ڈائریکٹر ہیں اور مجھے ان کا نام تجویز کرنے پر فخر ہے۔امریکی صدر جو بائیڈن نے جنوری میں نصرت جہاں چوہدری کو نامزد کیا تھا، 15 مئی کو وہ 49 کے مقابلے میں 50 ووٹ کے کم مارجن کے ساتھ تاحیات مدت کے لیے اس عہدے پر فائز ہوگئیں۔ پاکستانی نژاد امریکی وکیل زاہد قریشی امریکی تاریخ کے پہلے مسلمان امریکی وفاقی جج ہیں، انہیں بھی صدر جوبائیڈن نے مقرر کیا تھا اور 2021 میں نیو جرسی کے ڈسٹرکٹ کے وفاقی جج کے طور پر ان کی توثیق کی تھی۔اے سی ایل یو کی آفیشل ویب سائٹ پر ایک پوسٹ میں کہا گیا کہ نصرت جہاں چوہدری نے تارکین وطن کو دوران حراست خطرناک حالات سے بچانے کے لیے قانونی چارہ جوئی کی ہے اور ان کی ٹیم نے نظام حکومت میں شفافیت، فوجداری قانونی نظام اور پالیسی میں تبدیلی، ووٹنگ کے حقوق، تولیدی صحت کی دیکھ بھال تک رسائی، صنفی مساوات اور قیدیوں کے حقوق کے لیے کام کیا۔