پیرس: فرانس نے اگلے ماہ پیرس میں ہونے والی دفاعی نمائش میں اسرائیلی اسلحہ ساز کمپنیوں کو شو میں حصہ لینے سے روکتے ہوئے ساز و سامان کی نمائش پر پابندی لگا دی۔
الجزیرہ کی رپورٹ کے مطابق مذکورہ پابندی فرانسیسی صدر ایمانوئل میکرون کی جانب سے اسرائیل کو ہتھیاروں کی فراہمی روکنے کے مطالبے کے بعد سامنے آئی ہے۔
دفاعی نمائش کے منتظمین کی جانب سے اسرائیلی کمپنیوں کو مطلع کر دیا گیا کہ وہ 4 نومبر کو پیرس میں ہونے والے یورونوال دفاعی شو میں حصہ تو لے سکتی ہیں لیکن ساز و سامان کی نمائش کی اجازت نہیں ہوگی۔
منتظمین نے بتایا کہ فرانسیسی حکومت نے انہیں اپنے فیصلے سے آگاہ کر دیا کہ اسرائیلی وفود کو بغیر کسی آلات کی نمائش کے شو شرکت کی منظوری دی جائے گی۔
منتظمین کے مطابق حکومتی فیصلے سے 7 اسرائیلی کمپنیاں متاثر ہوں گی۔
انہوں نے مزید کہا کہ حکومت کے فیصلے کے مطابق اسرائیلی کمپنیاں اور شہری جو شرکت کرنا چاہتے ہیں ان کا شو میں اوپر درج شرائط کے تحت استقبال کیا جائے گا۔
پچھلے دنوں فرانسیسی صدر ایمانوئل میکرون نے فلسطینیوں پر جاری حملوں پر گہری تشویش کا اظہار کیا اور لبنان میں زمینی فوج آپریشن شروع کرنے پر بھی اسرائیلی وزیر اعظم نیتن یاہو پر تنقید کی۔