اولپنڈی اور اسلام آباد میں مسلسل بارش سے نالہ لئی کے بہاؤ میں اضافہ ہوگیا،جڑواں شہروں میں بارش کے باعث گوالمنڈی میں پانی کی سطح 10 فٹ فٹ اور کٹاریاں 12 فٹ ہے۔ کٹاریاں میں نالہ لئی میں پانی کی سطح پری الرٹ 15.7 فٹ اور گوالمنڈی میں پری الرٹ 14.1 فٹ ہے۔
ترجمان واسا کے مطابق نالہ لئی میں پانی کی سطح ساڑھے 12 فٹ بلند ہوگئی۔ پانی کے بہاؤ میں اضافے کے باعث عملہ اور اضافی نفری تعینات کردی گئی ہے۔ واسا ، ضلعی انتظامیہ اور دیگر ادارے الرٹ ہیں جبکہ رین ایمرجنسی بھی پہلے سے نافذ کی گئی ہے۔
راولپنڈی میں نشیںی علاقے زیر آب آگئے ۔بوہڑ بازار سمیت ملحقہ علاقوں میں پانی جمع ہونے سے تاجروں کا کاروبار اور معمول کی زندگی متاثرہوئی،این ڈی ایم اے نے آئندہ 3 دنوں میں ملک کے مختلف شہروں میں 200 ملی میٹر تک بارش کا امکان ظاہر کیا ہے جب کہ راولپنڈی اور اسلام آباد میں بارش سے نالہ لئی میں پانی کی سطح خطرناک حد تک بلند ہوگئی۔
نیشنل ڈیزاسٹر مینجمنٹ اتھارٹی (این ڈی ایم اے) کے مطابق آئندہ 3 دنوں میں کشمیر، مالاکنڈ، ہزارہ اور گوجرانوالہ ڈویژن میں 200 ملی میٹر تک بارش متوقع ہے جب کہ پوٹھوہار، مردان اورلاہور ڈویژن میں بھی موسلادھار بارش کا امکان ہے۔
این ڈی ایم اے کا کہنا ہے کہ آئندہ 3 دنوں میں پنجاب میں فیصل آباد، ساہیوال، بہاولپور، ملتان، راجن پور جب کہ سندھ میں کراچی، میرپورخاص، سکھر، حیدر آباد، عمر کوٹ، بدین، ٹھٹہ، تھرپارکر میں بارش متوقع ہے۔
بارشوں کے پیش نظر این ڈی ایم اے نے صوبائی ڈیزاسٹر مینجمنٹ اتھارٹیز اور دیگر متعلقہ اداروں کو الرٹ جاری کردیا ہے بلوچستان میں ژوب، زیارت، قلات اور سبی ڈویژن میں بارش کا امکان ہے جب کہ کے پی میں ڈی آئی خان میں بھی بارش متوقع ہے۔
علاوہ ازیں نجی موسمیاتی ادارے کا کہنا ہےکہ کراچی میں بھی آئندہ 3 دن تک بارشوں کا امکان ہے، شہر میں کہیں 30 سے 50 تو کہیں 100 ملی میٹر تک بارش ہوسکتی ہے۔
دوسری جانب جڑواں شہروں راولپنڈی اور اسلام آباد میں موسلادھار بارش کے بعد رین ایمرجنسی نافذ کردی گئی ہے۔
ایم ڈی واسا کا کہنا ہےکہ جڑواں شہروں میں مجموعی طور 50 ملی میٹر سے زائد بارش ریکارڈ کی جاچکی، نشیبی علاقوں میں واسا کی ٹیمیں ہیوی مشینری کی مدد سے نکاسی آب میں مصروف ہیں۔
ایم ڈی واسا کے مطابق نالہ لئی میں گوالمنڈی کے مقام پر پانی کی سطح 12 فٹ ہوگئی ہے اور نالہ لئی پر خطرے کے سائرن بجا دیے گئے جب کہ نالہ لئی کے اطراف آبادی کو محتاط رہنے کی ہدایت ی گئی ہے۔
نالہ لئی میں پانی کی سطح بلند ہونے پر ندیم کالونی اور جاویدکالونی کے مکینوں کوالرٹ کردیا گیا ہے، سائرن بجاکر نشیبی علاقوں کے مکینوں کو محفوظ مقام پر منتقل ہونےکی ہدایت جاری کردی گئی ہے۔