قومی اسمبلی میں قائد حزب اختلاف عمر ایوب نے قومی اسمبلی کے اجلاس میں اظہار خیال کرتے ہوئے کہا ہے کہ عوام اور پاکستان کے خلاف بجٹ اکنامک ہِٹ مین نے بنایا ہے، سرمایہ کار قانون کی بالادستی نہ رکھنے والے ملک میں سرمایہ کاری نہیں کرتے۔
بجٹ کے حوالے سے انہوں نے کہا کہ کہ بجٹ ایک غیرقانونی دستاویز ہے جو یہاں پیش ہوا، بجٹ جب پیش ہوتا ہے تو فنانس بل سمیت تمام دستاویز یہاں پیش کرنے ہوتے ہیں، ایوان میں وہ دستاویز آئے ہی نہیں، صرف وزیر خزانہ کی تقریر تھی۔
50 سال میں سب سے کم سرمایہ کاری موجودہ حکومت کے دور میں ہوئی، حکومت ہر اعدادوشمار میں دو نمبری کررہی ہے، ملک میں بے روزگاری اور افراط زر میں نمایاں اضافہ ہوا ہے اور فی کس آمدن میں کمی آئی ہے۔
قائد حزب اختلاف نے کہا کہ شہباز شریف خود کو متنازع بناکر خوش ہوتے ہیں، کرپشن کیسز میں ملوث افراد کرپشن کیسے ختم کریں گے؟