امیر جماعت اسلامی حافظ نعیم الرحمان نے پشاور میں غزہ مارچ سے خطاب کرتے ہوئے کہا ہے کہ ملک دہشت گردی کی لپیٹ میں ہے، سب کو مل کر بیٹھنا پڑےگا۔
انہوں نے کہا کہ سب کو آئینی حدود میں رہنا ہوگا،ملک دہشت گردی کے لپیٹ میں ہے، را اور بلیک واٹر ہمارے گھر میں داخل ہو چکے ہیں، بھارت کا ایجنڈا امریکا کا ایجنڈا ہے۔
پاکستان کی طاقت کو توڑا جا رہا ہے، ہم لڑنا نہیں چاہتے مگر امریکی قونصلیٹ کی جانب بڑھنے سے حکمران حرکت میں آ جاتے ہیں، جس دن جماعت اسلامی نے فیصلہ کیا پھر کوئی ہمارا راستہ بند نہیں کرسکتا۔
حماس بن کر ہر ظلم کے خلاف مظلوم کے ساتھ کھڑے ہوں گے، حکمران حماس کو تسلیم کرکے زخمی فلسطینیوں کو پاکستان لائیں ان کا علاج ہم کروائیں گے۔ ہم فلسطین،کشمیر اور میانمار کا مسئلہ بھی آگے لے کر جائیں گے، فلسطینی امت مسلمہ کا کفارہ ادا کر رہے ہیں۔