ملک کے چھوٹے بڑے شہروں اور قصبوں میں نماز عید کے روح پرور اجتماعات منعقعد ہوئے، ملک میں امن و سلامتی اور خوشحالی کے لئے خصوصی دعائیں مانگی گئیں۔
کراچی
کراچی میں 4 ہزار سے زائد مقامات پرعیدالفطر کے اجتماعات ہوئے جبکہ اجتماعات کی سیکیورٹی کے لئے سخت انتظامات کیے گئے ہیں۔
شہر قائد میں سب سے پہلے نماز عید سبیل والی مسجد گرومندر میں پڑھائی گئی،علمائے کرام نے اپنے خطبے میں عید الفطر کی فضلیت اور فلسفے پر روشنی ڈالی۔
ملک کی ترقی، خوشحالی اور امت مسلمہ کی فلاح و بہبود کے لئے خصوصی دعائیں مانگیں گئیں۔
نماز عید کے اجتماع میں بچے اور معمر افراد بھی شامل تھے، نماز عید کے بعد لوگوں نے گلے مل کر ایک دوسرے کو عید کی مبارک دی۔
اسلام آباد
ملک بھر میں عید کی خوشیاں منائی جارہی ہیں، جڑواں شہروں میں نماز عید کے بڑے بڑے اجتماعات ہوئے۔
اسلام آباد میں نماز عید کا سب سے بڑا اجتماع شاہ فیصل مسجد میں ہوا، صبح سويرے شہر کا موسم خوشگوار رہا۔
صدرمملکت عارف علوی، سفارت کاروں، سرکاری افسران اور شہریوں کی بڑی تعداد نے شرکت کی
نماز عید کے بعد لوگ ایک دوسرے سے گلے ملتے اور عید کی مبارک باد دیتے رہے جبکہ بچے بھی نماز عید میں اپنے والدین کے ساتھ پرجوش نظر آئے۔
جڑواں شہرراولپنڈی میں عید کی نماز کا سب سے بڑا اجتماع لیاقت باغ میں ہوا، سابق وفاقی وزیر شیخ رشید نے بھی نمازعید ادا کی۔
عید کے خطبات میں ملکی سلامتی ، معاشی مشکلات کے خاتمے سمیت جڑواں شہروں میں سیکیورٹی کے سخت انتظامات کیے گئے تھے۔
لاہور
ملک بھر کی طرح لاہور میں بھی عیدالفطر مذہبی جوش و جذبے کے ساتھ منائی جا رہی ہے۔ شہر کے متعدد مقامات پر نماز عید کے روح پرور اجتماعات منعقعد ہوئے، ملک میں امن و سلامتی اور خوشحالی کے لئے خصوصی دعائیں مانگی گئیں۔
لاہور میں 700 سے زائد مساجد میں نماز عید ادا کی گئی، سب سے بڑا اجتماع بادشاہی مسجد لاہور میں ہوا، جہاں گورنر پنجاب بلیغ الرحمان اور چیف سیکرٹری پنجاب سمیت دیگر نے نماز عید ادا کی۔
وزیراعظم شہباز شریف نے اپنی رہائش گاہ ماڈل ٹاون لاہور میں نماز عید ادا کی، دونوں بیٹے سلیمان شہباز اور حمزہ شہباز بھی موجود تھے۔
ملکی امن، سلامتی، ترقی و خوشحالی کے لئے دعائیں کی گئیں جبکہ کشمیری اور فلسطینی بہن بھائیوں کی آزادی اور پوری امت مسلمہ کے لئے بھی دعا کی۔
اجتماعات میں سیکیورٹی کے بھی سخت انتظامات کیے گئے تھے۔
جے یو آئی کے سربراہ مولانا فضل الرحمان نے ڈی آئی خان میں عید کی نماز ادا کی
وزیراعظم شہبازشریف نےکہا کہ اتحادی حکومت کی مسلسل کوشش رہی ہےکہ معاشی مشکلات کاکم سےکم بوجھ عوام تک پہنچے، اللہ تعالیٰ ہمیں ان آزمائشوں سے نجات عطا فرمائےگا، سب کوپاکستان کی بہتری کی تعمیری سوچ، یکسوئی اور مسلسل محنت سے کھوئی ہوئی منزل تک پہنچنا ہے۔
مسلح افواج، چیئرمین جوائنٹ چیفس آف اسٹاف اور آرمی چیف کی جانب سے بھی قوم کوعید کی مبارک باد دی گئی ہے۔
عسکری قیادت کا کہنا ہے کہ پرامن ماحول میں یہ تہوار ہمارےتمام شہدا اورغازیوں کی مرہون منت ہے، شہدا اور غازیوں کوسلام، اللہ تعالی پاکستان پراپنی رحمتوں کا سایہ برقرار رکھے۔