صیہونی وزیر دفاع نے غزہ میں جاری جنگ کو مزید علاقوں تک پھیلانے کی دھمکی دے دی۔
صیہونی وزیر دفاع یوآو گیلنٹ نے کہا کہ صیہونی فوج حزب اللہ کے خلاف اپنی مہم کو مزید وسعت دے گی جس میں ہم ہر اس جگہ حملے کریں گے جہاں سے حزب اللہ کاررروائیاں کررہی ہے۔
صیہونی وزیر دفاع نے کہا کہ صیہونی فوج بیروت اور دمشق سمیت دیگر دور درواز کے علاقوں میں بھی کارروائیاں کرے گی۔
دوسری جانب خلیجی میڈیا کا بتانا ہےکہ صیہونی فوج کے غزہ میں وحشیانہ حملے جاری ہیں جس میں صیہونی فوج نے ایک اسپورٹس سینٹر پر حملہ کیا جہاں بے گھر افراد نے پناہ لی ہوئی تھی، صیہونی فوج کے حملے میں 15 فلسطینی شہید ہوگئے۔
رپورٹس کے مطابق صیہونی فوج نے جمعہ اور ہفتے کی درمیانی شب سینٹرل غزہ میں حملے کیے جس میں متعدد بے گھر فلسطینی شہید ہوئے ہیں۔
صیہونی فوج نے سینٹرل غزہ کے نصیرت اورمغازی کیمپ میں رہائشی عمارتوں کو نشانہ بنایا جب کہ صیہونی فوج نے دیر البلاح کے علاقے میں بھی حملے کیے جسے محفوظ علاقہ بتایا گیا تھا۔
میدیا رپورٹس کے مطابق گزشتہ رات صیہونی فوج نے شمالی غزہ کے علاقوں میں بڑی تعداد میں فضائی حملے کیے۔
میڈیا رپورٹس میں بتایا گیا ہےکہ سول ڈیفنس اور طبی عملہ طبی آلات کی قلت کے باوجود زخمیوں کی جلد صحتیابی کے لیے کوششیں کررہا ہے۔
دوسری جانب صیہونی فوج کا کہنا ہےکہ اس نے الشفاء اسپتال میں اپنا آپریشن جاری رکھا ہوا ہے، اس آپریشن میں حماس کے متعدد جنجگوؤں کو مارا گیا ہے۔