راولپنڈی (شوریٰ نیوز)257ویںکورکمانڈر کانفرنس،اندرونی و بیرونی خطرات کیخلاف عزم کا اعادہ تفصیلات کے مطابق آرمی چیف جنرل سید عاصم منیر کی زیر صدارت جی ایچ کیو میں 257ویں کور کمانڈرز کانفرنس منعقد ہوئی۔ کانفرنس میں پاکستان کو درپیش بیرونی اور داخلی سلامتی کے چیلنجوں سمیت ملکی اور علاقائی صورت حال کا جائزہ لیا گیا۔پاک فوج کے شعبہ تعلقات عامہ کی جانب سے جاری پریس ریلیز کے مطابق کور کمانڈرز کی کانفرنس میں اس بات کی توثیق کی گئی کہ عسکری قیادت چیلنجز کے مکمل ادراک سے آگاہ ہے اور وہ پاکستان کے عوام کی حمایت کے ساتھ اپنی آئینی ذمہ داریاں نبھانے کا عزم رکھتی ہے۔ کانفرنس نے اندرونی اور بیرونی خطرات کے خلاف قومی ردعمل کی مکمل حمایت کے لیے مسلح افواج کے عزم کا اعادہ کیا۔کانفرنس کے دوران اس بات پر بھی روشنی ڈالی گئی کہ جب سیکورٹی فورسز مغربی سرحد کے ساتھ والے علاقوں میں انٹیلی جنس کی بنیاد پر کارروائیاں کر رہی ہیں، وہاں دہشت گردی کی لعنت کو طویل مدتی بنیادوں پر ختم کرنے کے لیے پوری قوم اور پوری حکومت کی مشترکہ سوچ اپنانے کی ضرورت ہے۔حکومت کی طرف سے منظور شدہ دہشت گردوں کے خلاف انسداد دہشت گردی کی یہ مہم پورے نظام کے ذریعے ملک میں دہشت گردی، انتہا پسندی اور عدم استحکام کے عوامل کے خاتمے کی طرف لے جائے گی۔ کور کمانڈرز نے قومی طاقت کے تمام عناصر کے مربوط اطلاق کے ذریعے دہشت گردی کے خلاف لہر کو موڑنے کے لیے نیشنل سیکورٹی کونسل کے طے کردہ اہداف کو حاصل کرنے کی یقین دہانی کرائی ہے۔