مسلم لیگ (ن) کی رہنما عظمیٰ بخاری نے کہا ہےکہ پاکستان کے لیے بڑا اعزاز ہے کہ مریم نواز پاکستان کی پہلی خاتون وزیراعلیٰ بننے جارہی ہیں، مریم نواز وزیراعلیٰ منتخب ہونے کے بعد پہلی تقریر میں ہیلتھ کارڈ سے متعلق روڈ میپ دیں گی۔
لیگی رہنما نے کہا کہ چیلنجز بالکل ہیں لیکن مریم نواز کو نواز شریف کی سرپرستی حاصل ہے، سیاسی کارکن ہر وقت سیکھ رہا ہوتا ہے، یوتھ پروگرام مریم نواز کا آئیڈیا تھا۔
بیورو کریسی کے ذریعے حکومت چلانے کا تاثر غلط ہے، مریم نواز اپنے لیے جس کابینہ کا انتخاب کررہی ہیں وہ نوجوان اور تجربہ کار لوگوں کا مجموعہ ہوگی جب کہ مریم اورنگزیب اور دیگر خواتین مریم نواز کی معاونت کریں گی۔
انہوں نے مزید کہا کہ آئی ایم ایف پروگرام کی کیا شرائط ہوتی ہیں اس کے بعد مفت بجلی دینے کا فیصلہ کریں گے۔