ترجمان دفتر خارجہ ممتاز زہرا بلوچ نے کہا کہ پاک افغان سرحد کی قانونی حیثیت پر من گھڑت دعوے حقائق تبدیل نہیں کر سکتے، پاک افغان سرحد سے متعلق جغرافیہ، تاریخ اور بین الاقوامی قانون کے حقائق تبدیل نہیں ہو سکتے۔
افغان فریق پاکستان کے حقیقی سلامتی کے خدشات کو دور کرے،خیال رہے کہ افغانستان کے نائب عبوری وزیر خارجہ شیر محمد عباس استنکزئی کی جانب سے ایک بیان دیا گیا تھا جس کے مطابق افغانستان ڈیورنڈ لائن کو کبھی بھی سرحد تسلیم نہیں کرے گا۔
افغانستان سے سوویت یونین کے انخلا کی 35 ویں سالگرہ کے موقع پر لوگر میں ایک اجتماع سے خطاب کرتے ہوئے شیر محمد عباس استنکزئی کا کہنا تھا کہ افغانستان کی سرزمین اب بھی لائن کے دوسری طرف ہے، افغانستان آنے کے لیے افغان عوام کو ویزے اور پاسپورٹ کا اصول ہمیں قبول نہیں، ہم نے ڈیورنڈ کو کبھی تسلیم نہیں کیا اور نہ کریں گے۔