سابق وزیراعظم نواز شریف نے کہا کہ عمران خان نے جیسے ہی اقتدار جاتا دیکھا پاکستان پر حملہ کیا اور نتیجہ آج عدالت میں آیا ہے میں سمجھتا ہوں یہ افسوسناک کردار رہا ہے۔
انہوں نےہارون آباد میں انتخابی جلسے سے خطاب میں کہاکہ تبدیلی نے پاکستان کا کیا حشر کیاکہ 25 روپے کی ایک روٹی ملتی ہے، نوازشریف کےدور میں 25 روپے میں پانچ روٹیاں ملتی تھیں۔
نوازشریف کے دور میں گیس اور بجلی سستی تھی، تبدیلی نے عوام کے ساتھ یہ سلوک کیا ہے، نوازشریف نے لوڈ شیڈنگ ختم کی، سستی بجلی لے کر آیا، میرے دور میں جس کا بل ایک ہزار آتا تھا، آج 20 ہزار آتا ہے۔
نوازشریف کے دور میں چینی 35 روپے کلو تھی، آج 150روپے کلو ہے، پیٹرول ہمارے دور میں 60روپے لیٹر تھا، کسان میرے عزیز بھائی ہیں، ان سے پوچھیں نوازشریف کے دورمیں ٹریکٹر کتنے کا تھا؟ 8 لاکھ روپے کا تھا۔
ہمیں تو بیٹے سے تنخواہ نہ لینے پر وزارت عظمیٰ سےہٹادیاگیا، ایک بار نہیں، مجھے تین تین بار وزارت عظمیٰ سےہٹایاگیا، ہمیں جیلوں میں بھیجا گیا اور تماشہ بنا دیا گیا۔
ایسے نقصان ہوئے کوئی تلافی نہیں ہوئی، والدہ کو قبر میں نہیں اتار سکا، کلثوم فوت ہوتی ہے جیل میں اطلاع ملتی ہے، میں غم دکھ سہہ گیا، ظلم سہنے کے باوجودقومی راز فاش نہیں کیا خود پر برداشت کیا لیکن میں نے پاکستان پر زخم نہیں لگنے دیا۔
ٹرانسپیرنسی نے کہا ہے عمران خان کا دور سب سے کرپٹ ترین دور تھا ، آؤ ثاقب نثار بتاؤ تم نے اس کو صادق اور امین کا سرٹیفکیٹ دیا تھا، ان جج نے دیا تھا جو استعفے دے کر گھر چلے گئے۔