غزہ میں صیہونی فوج کے وحشیانہ حملے جاری ہیں ،صیہونی بمباری سے 24 گھنٹوں میں مزید 215 فلسطینی شہید ہوگئے۔
غیر ملکی میڈیا رپورٹس کے مطابق صیہونی فوج نے شمالی غزہ میں اقوام متحدہ امدادی ایجنسی کے پناہ گزین اسکول کا محاصرہ کرلیا، گولہ باری اور فائرنگ سے 10 فلسطینی شہید ہوگئے۔
فلسطینی وزارت صحت کا کہنا ہے کہ صیہونی حملوں میں 24 گھنٹوں میں مزید 215 فلسطینی شہید ہوگئے۔ 7 اکتوبر سے فلسطینی شہدا کی تعداد 26 ہزار 637 ہوگئی جبکہ صیہونی حملوں میں اب تک 65 ہزار 387 فلسطینی زخمی ہوئے ہیں۔
رپورٹ میں بتایا گیا ہے کہ صیہونی حکومت کی جانب سے غزہ میں رہائشی علاقوں پر بھی بمباری کی جارہی ہے جس کی وجہ سے متعدد شہادتوں کا خدشہ ہے۔
ادھر صیہونی حکومت کا ال امل اسپتال کا محاصرہ آٹھویں روز بھی جاری ہے، اسپتال کے اطراف صیہونی فوج کی فلسطینی مزاحمت کاروں سے شدید لڑائی ہوئی۔
دوسری جانب صیہونی فوج نے مغربی کنارے میں بھی فائرنگ کردی، آنسو گیس کی شیلنگ کی وجہ سے مزید5 فلسطینی شہید ہوگئے جبکہ متعدد کو گرفتار کیا گیا۔
اس کے علاوہ شام میں ایرانی حمایت یافتہ ملیشیا کے ٹھکانے پر اسرئیل نے فضائی حملہ کیا جس کے نتیجے میں 6 افراد جاں بحق ہوگئے جبکہ حزب اللہ نے شمالی صیہونی حکومت میں صیہونی فوجی اڈوں کو ٹینک شکن میزائلوں سے نشانہ بنایا۔