سابق چیئرمین سینیٹ میاں رضا ربانی نے نگران حکومت پر تنقید کرتے ہوئے کہا ہے کہ اس حکومت کے ممبران اپنی مستقبل کی نوکریاں پکی کرنے میں مصروف ہیں۔
اپنے ایک بیان میں رضا ربانی نے کہا کہ نگران وزیر اعلیٰ پنجاب نے اپنے لیے بطور سربراہ پی سی بی نوکری کا بندوبست کر لیا ہے۔
انہوں نے کہا کہ نگران وزیر خزانہ شمشاد اختر کو تین سال کے لیے بطور چیئرپرسن بورڈ آف ڈائریکٹرز سوئی سدرن گیس کمپنی نامزد کر دیا گیا ہے۔ شمشاد اختر وزیر خزانہ کے ساتھ ساتھ پہلے سے ہی اس عہدے پر عارضی طور پر برجمان ہیں۔
رضا ربانی کا کہنا تھا کہ وزیر خزانہ کی نامزدگی کمپنیز ایکٹ اور ایس او ای ایکٹ کی خلاف ورزی ہے۔ایسا ظاہر ہے کہ نگران اب کرسی پر قبضہ کرنے والے بن گئے ہیں۔
واضح رہے کہ محسن نقوی کو چیئرمین منیجمنٹ کمیٹی پاکستان کرکٹ بورڈ (پی سی بی) تعینات کرنےکی منظوری دے دی گئی۔
محسن نقوی اس وقت نگران وزیراعلیٰ پنجاب بھی ہیں۔