پاکستان تحریک انصاف (پی ٹی آئی) کے سینیئر نائب صدر شیر افضل مروت نے کہا کہ انہیں سندھ سے واپس بلانے کے نوٹیفکیشن سے بانی پی ٹی آئی نے لاتعلقی کا اظہار کیا ہے۔
انہوں نے کہا کہ انہیں پارٹی عہدے سے ہٹانے کے حوالے سے حامد خان نے جھوٹ بولا، انہیں ہٹایا گیا ہوتا تو اس کا نوٹیفکیشن جاری ہوتا۔
بانی پی ٹی آئی نے گوہر خان سے کہا کہ رؤف حسن کے بیانات موجودہ حالات میں نقصان دہ ہیں، جس کے بعد انہیں آئندہ سخت اجتناب برتنے کا پیغام دیا گیا ہے۔
مروت کا کہنا تھا کہ قطعی طور پر نہیں کہا جا سکتا کہ آزاد امیدوار پارٹی کے ساتھ وفادار رہے گا یا نہیں، آزاد امیدواروں کو پارٹی سے توڑا جاسکتا ہے۔ بانی پی ٹی آئی تقریباً دس فیصد سے زیادہ امیدواروں کو ذاتی طور پر نہیں جانتے۔
خیال رہے کہ بانی پی ٹی آئی عمران خان نے شیر افضل مروت کو سندھ میں سیاسی سرگرمیاں معطل کرنےکی ہدایت کر دی تھی اور انہیں اسلام آباد طلب کیا گیا تھا۔