سندھ، پنجاب اور خیبرپختونخوا کے میدانی علاقوں میں آج بھی کڑاکے کی سردی کے ساتھ شدید دھند کا راج جاری ہے۔
ایوی ایشن ذرائع کے مطابق شدید دھند کے باعث مختلف ہوائی اڈوں پر فلائٹ آپریشن متاثر رہا جس سے 30 ملکی اور غیر ملکی پروازیں منسوخ ہوگئیں۔
سعودی ائیرلائن کی پرواز سمیت 6 پروازوں کو متبادل ہوائی اڈوں پر اتارا گیا، 2024 کے پہلے 9 دن کے دوران پاکستان کی 311 پروازیں منسوخ کی جا چکیں ہیں۔
موٹرویز پولیس کے مطابق دھند کے باعث موٹرویز ایم 2 کو پنڈی بھٹیاں سے کوٹ مومن تک ٹریفک کیلئے بند کیا گیا ہے۔
ترجمان کے مطابق شدید دھند کے باعث موٹرویز ایم 3 کو سمندری سے درخانہ تک اور ملتان سکھر موٹرویز کو بھی ٹریفک کیلئے بند کیا گیا ہے۔
دوسری جانب ملک بھر میں کڑاکے کی سردی کا راج جاری ہے، قلات میں پارا منفی 6 ڈگری تک گر چکا جبکہ کوئٹہ میں بھی سردی کی شدت میں اضافہ ہوگیا۔
کوئٹہ میں سڑکوں پر جمع پانی اور دکانوں میں رکھا دودھ تک جم گیا جبکہ ہنّہ جھیل کا پانی بھی برف میں تبدیل ہوگیا، سردیوں کے موسم میں سائیبیریا سے نقل مکانی کرنے والے مہمان پرندے بھی جھیل پر پہنچ گئے۔
محکمہ موسمیات کے مطابق پشاور میں 40 سال بعد شدید سردی کی لہر جاری ہے، کراچی میں بھی سائیبیریا کی سرد ہواؤں کی آمد سے سردی کی شدت میں اضافہ ہو گیا ہے۔
محکمہ موسمیات کے مطابق کراچی میں درجہ حرارت 10 سے 12 ڈگری رہنے کا امکان ہے،ادھر پنجاب، خیبر پختونخوا اور سندھ میں سرد موسم کے ساتھ دھند اور اسموگ میں بھی کمی نہ آسکی ہے، لاہور میں دن کے اوقات میں بھی دھند چھائی رہی۔