بنگلا دیش میں عام انتخابات آج ہوں گے، بنگلا دیش نیشنل پارٹی اور دیگر اپوزیشن جماعتوں نے عام انتخابات کے بائیکاٹ کا اعلان کرتے ہوئے، دو روزہ ملک گیر ہڑتال کی کال دیدی ہے۔
عام انتخابات کا بائیکاٹ کرنے والی اپوزیشن جماعتوں کی جانب سے عوام سے ووٹ نہ ڈالنے کی بھی اپیل کی گئی ہے۔
دوسری جانب اپوزیشن کے بغیر انتخابات میں شیخ حسینہ واجد کی پانچویں بار وزیراعظم منتخب ہونے کی بھی راہ ہموار ہو گئی ہے۔
ادھر الیکشن سے پہلے پُرتشدد واقعات کے دوران ڈھاکا میں 5 اسکولوں اور 4 پولنگ بوتھ کو آگ لگا دی گئی جبکہ گذشتہ روز مسافر ٹرین میں آگ لگنے سے بھی 5 افراد جاں بحق جبکہ 8 زخمی ہوگئے تھے۔
پولیس نے واقعے کا ذمہ دار اپوزیشن کو قرار دے کر 7 ارکان گرفتار کرلیے، اپوزیشن نے پولیس کی جانب سے عائد کردہ الزامات مسترد کردیے۔
اپوزیشن جماعت نے دو روزہ ملک گیر ہڑتال کی اپیل کے بعد الیکشن سے پہلے ملک بھر میں سکیورٹی فورسز کی بھاری نفری تعینات کر دی گئی ہے۔
اپوزیشن غیر جانبدار نگران حکومت اور شیخ حسینہ واجد کے استعفیٰ کا مطالبہ کررہی ہے۔
دوسری جانب اب تک بنگلادیش نیشنل پارٹی کی مرکزی قیادت سمیت 11 ہزار افراد گرفتار کیے جاچکے ہیں جبکہ ہزاروں روپوش ہیں۔
ادھر عالمی برادری نے ملک میں متنازع انتخابات کے انعقاد پر اظہار تشویش کیا ہے۔