غاصب صیہونی حکومت کے ایک تحقیقی مرکز کی طرف سے جاری اعداد و شمار سے پتہ چلتا ہے کہ بین الاقوامی پیمانے پر صیہونی حکومت حامی مظاہروں کے مقابل صیہونی حکومت مخالف مظاہروں میں 12 گنا اضافہ ہوا ہے۔
ارنا کی رپورٹ کے مطابق غاصب صیہونی حکومت کے داخلی سلامتی کے تحقیقی مرکز کی طرف سے جاری ہونے والے اعداد و شمار بین الاقوامی پیمانے پر صیہونی حکومت حامی مظاہروں کے مقابل صیہونی حکومت مخالف مظاہروں میں 12 گنا اضافے کی غمازی کرتے ہیں۔
رپورٹ کے مطابق مذکورہ تحقیقی مرکز کے اعداد و شمار سے پتہ چلتا ہے کہ 7 اکتوبر سے 8 دسمبر سنہ 2023 تک دنیا کے مختلف علاقوں میں غاصب صیہونی حکومت کے خلاف سات ہزار 557 سے زیادہ مظاہرے ہوئے جبکہ اسی دوران غاصب صیہونی حکومت کی حمایت میں صرف 602 مظاہروں کا انعقاد ہوا۔
غاصب صیہونی حکومت کے داخلی سلامتی کے تحقیقی مرکز نے لکھا ہے کہ مذکورہ اعداد و شمار دنیا میں غاصب صیہونی حکومت کے مزید الک تھلگ پڑ جانے کا ثبوت ہیں اور یہی بات غاصب حکومت کے بعض حکام بھی اب سے پہلے کہہ چکے ہیں۔
مثال کے طور پر غاصب صیہونی حکومت کے سابق وزیر نفتالی بنیٹ نے ابھی کچھ دن پہلے کہا تھا کہ عالمی سطح پر حالات ہمارے حق میں نہیں ہیں اور عالمی رائے عامہ بھی اس وقت ہمارے لئے مثبت نہیں ہے۔
ادھر ایک صیہونی لیڈر آوگدور لیبرمین نے، جو 2002 سے 2022 تک نائب وزیر اعظم سمیت غاصب صیہونی حکومت میں کئی اہم عہدوں پر رہ چکے ہیں، کہا ہے کہ صیہونی حکومت کو اب سے پہلے کبھی اس حد تک داخلی انتشار اور خارجی تنہائی کا سامنا نہیں ہوا ہے۔