متحدہ قومی موومنٹ (ایم کیو ایم) پاکستان کےکنوینر خالد مقبول صدیقی نے میئرکراچی اور ٹاؤن ناظمین کو ترقیاتی کاموں کے افتتاح سے روکنےکے لیے چیف الیکشن کمشنر سکندر سلطان راجہ کو خط لکھ دیا۔
خط میں خالد مقبول صدیقی نےکہا ہےکہ میئر اور ٹاؤن ناظمین انتخابی ضابطہ اخلاق کی خلاف ورزی کر رہے ہیں، میئر اور ناظمین کی جانب سے یہ سب سیاسی جماعتوں اور امیدواروں کےکہنے پر کیا جا رہا ہے۔
بلدیاتی نمائندوں کا یہ عمل انتخابات 2024 کے نتائج میں ہیرا پھیری کے مترادف ہے،میئر اور ٹاؤن ناظمین عوامی فنڈز کا استعمال اور ترقیاتی منصوبوں کا افتتاح کر رہے ہیں۔
عوامی پیسا اور وسائل کا استعمال ووٹرز کو متاثر کرنےکے لیےکیا جارہا ہے، یہ معاملہ انتخابی عمل کی ساکھ کو متاثر کر رہا ہے، تمام جماعتوں کو لیول پلیئنگ فیلڈ نہیں مل رہی۔
کنوینر ایم کیو ایم نے مطالبہ کیا ہےکہ انتخابی قوانین اور ضابطہ اخلاق کی خلاف ورزی کرنے والوں کے خلاف سخت کارروائی کی جائے، میئر اور ٹاؤن ناظمین کو ترقیاتی کاموں کے افتتاح سے روکا جائے۔