صیہونی فوج نے خان یونس شہر میں زمینی کارروائی کرتے ہوئے کئی عمارتوں کو تباہ کردیا۔
عالمی تنقید کے باوجود صیہونی حکومت نے غزہ پر اپنی جارحیت جاری رکھی ہوئی ہے اور اب اس نے خان یونس میں زمینی کارروائی کرتے ہوئے متعدد فلسطینیوں کو شہید اور کئی افراد کو زخمی کردیا۔
میڈیا رپورٹس میں بتایا گیا ہے کہ زمینی کارروائی میں صیہونی حکومت نے عمارتوں کو تباہ کردیا جب کہ صیہونی فوج نے دعویٰ کیا کہ عمارتوں میں حماس کے درجنوں کارکن رہائش پذیر تھے، ان عمارتوں میں حماس کی آپریشنل سرگرمیاں جاری تھیں۔
اس کے علاوہ صیہونی فوج نے شمالی غزہ میں تباہ سرنگوں کی ویڈیو بھی جاری کردی۔
میڈیا رپورٹس کے مطابق صیہونی حکومت نے رفح سمیت دیگر مقامات پربھی حملے کیے ہیں، اس حوالے سے صیہونی حکومت کے وزیر دفاع کا کہنا ہے کہ اہداف کے حصول تک غزہ میں فوجی آپریشن جاری رہے گا۔
فلسطین کی مزاحمتی تنظیم حماس کی جانب سے بھی صیہونی حکومت کے خلاف جوابی کارروائی جاری ہے، غزہ میں صیہونی فوجیوں کے خلاف کارروائی کرتے ہوئے حماس نے متعدد صیہونی ٹینکوں اور بکتر بند گاڑیوں کو تباہ کردیا۔
دوسری جانب اقوام متحدہ کے سربراہ نے ایک بار پھر فوری انسانی بنیادوں پر جنگ بندی کا مطالبہ کیا اور خبردار کیا کہ تنازع کے پھیلاؤ سے پورے خطے کے لیے تباہ کن نتائج ہوں گے۔
ادھر عالمی ادارہ صحت نے غزہ میں بیماریاں پھیلنے کا خدشہ ظاہر کیا ہے۔