صیہونی حکومت کا مقبوضہ فلسطین کے علاقے غزہ میں زمینی آپریشن میں جانی نقصان بڑھنے لگا۔
صیہونی حکومت نے غزہ کو مٹی کا ڈھیر بنانے کے بعد 27 اکتوبر سے زمینی آپریشن شروع کیا ہے اور یہ اب تک جاری ہے۔
صیہونی افواج کو غزہ میں مجاہدین کی جانب سے شدید مزاحمت کا سامنا ہے اور اب مالی نقصان کے ساتھ ساتھ صیہونی افواج کا جانی نقصان بھی بڑھ رہا ہے۔
صیہونی افواج نے غزہ کے زمینی آپریشن میں مزید 5 فوجیوں کی ہلاکت کی تصدیق کی ہے۔
صیہونی افواج کے مطابق 17 دسمبر اتوار کو غزہ میں زمینی آپریشن میں افسر سمیت 4 فوجی ہلاک ہوگئے جبکہ 14 دسمبر کو زخمی ہونے والا فوجی بھی مرگیا۔
صیہونی حکام نے بتایاکہ غزہ کے زمینی آپریشن میں مرنے والے صیہونی فوجیوں کی تعداد 127 تک پہنچ گئی۔
دوسری جانب مقبوضہ فلسطین کی مزاحمتی تنظیم حماس کے عسکری ونگ القسام بریگیڈز نے 17 دسمبر کو صیہونی فوجی گاڑی پر حملے کی ویڈیو جاری کی ہے۔
ویڈیو میں فوجی گاڑی کو مکمل تباہ ہوتے اور صیہونی فوجیوں کو جھلسی ہوئی حالت میں بھاگتے ہوئے دیکھا جا سکتا ہے۔
اُدھر مغربی طاقتوں کی ایما پر صیہونی حکومت کی غزہ وحشیانہ بمباری جاری ہے۔ فلسطینی وزارت صحت کے مطابق آج غزہ صیہونی بمباری میں 151 فلسطینی شہید ہوئے۔
فلسطینی حکام نے بتایاکہ 7 اکتوبر سے اب تک غزہ میں شہید فلسطینیوں کی تعداد 19 ہزار 453 ہوگئی جبکہ زخمیوں کی تعداد 52 ہزار 286 ہے۔