صیہونی اپوزیشن لیڈر یائر لاپڈ نے صیہونی وزیراعظم نیتن یاہو سے مستعفی ہونے کا مطالبہ کر دیا۔
صیہونی ٹی وی کو انٹرویو میں یائر لاپڈ کا کہنا تھا کہ نیتن یاہو صیہونی عوام کا اعتماد کھو چکے ہیں، وہ وزیراعظم کی حیثیت سے مزید کام جاری نہیں رکھ سکتے۔
انہوں نے کہا کہ نیتن یاہو عالمی برادری اور سکیورٹی اسٹیبلشمنٹ کا بھی اعتماد کھو چکے ہیں۔
صیہونی اپوزیشن لیڈر نے مزید کہا کہ نیتن یاہو اور صیہونی سکیورٹی حکام نے 7 اکتوبر کے حملوں میں ناقابل معافی ناکامی کا ارتکاب کیا ہے۔
7 اکتوبر کےحملے روکنے میں ناکامی پر صیہونی اپوزیشن لیڈر نے مطالبہ کیا کہ نیتن یاہو اپنے عہدے سے فوری مستعفی ہو جائیں اور صیہونی حکومت میں نئے انتخابات کرائے جائیں۔
واضح رہے کہ صیہونی حکومت پر حماس کے حملوں کے بعد نیتن یاہو نے اپوزیشن لیڈر بینی گینٹز کے ساتھ دوران جنگ ایمرجنسی حکومت کے قیام کا معاہدہ کیا تھا تاہم یائر لاپڈ نے اس ایمرجنسی حکومت کا حصہ بننے سے انکار کر دیا تھا۔
نیتن یاہو کی پارٹی نے اپوزیشن لیڈر کی جانب سے صیہونی وزیراعظم کے مطالبے کو شرمناک قرار دیتے ہوئے سماجی رابطوں کی ایپلی کیشن پر جاری بیان میں کہا کہ جنگ کے حالات میں اس طرح کا مطالبہ انتہائی شرمناک ہے۔