صیہونی فوج کے ہاتھوں حماس کی جانب سے یرغمال بنائے گئے اپنے ہی فوجیوں کے قتل پر ہیومن رائٹس واچ نے ردعمل دیا ہے۔
ہیومن رائٹس واچ کے صیہونی حکومت و فلسطین کے لیے ڈائریکٹر عمر شاکر نے اپنے بیان میں کہا کہ پہلےگولی مارو، پھرپوچھو، صیہونی فوج کا اقدام ان کی دیرینہ مشق کی نشاندہی کرتا ہے۔
عمر شاکر کا کہنا ہے کہ یرغمالیوں کے قتل کا واقعہ غیر مسلح لوگوں پر صیہونی حکومت کے غیرقانونی طور پرگولی چلانے کا ٹریک ریکارڈ بھی ظاہرکرتا ہے۔
دوسری جانب عرب میڈیا کا بتانا ہے کہ صیہونی یرغمالیوں کے قتل کے بعد باقی مغویوں کی رہائی کے لیے حماس کے ساتھ مذاکرات دوبارہ شروع کرنے کے لیے نیتین یاہو حکومت پر مزید دباؤ بڑھا ہے۔
دوسری جانب فرانسیسی وزارت خارجہ نے رفح میں رہائشی عمارت پر صیہونی حملےکی وضاحت مانگ لی ہے۔
فرانسیسی وزارت خارجہ کے مطابق صیہونی حکام رفح میں رہائشی عمارت پربمباری کے حالات پر وضاحت کریں، ایک فرانسیسی شہری بدھ کو رفح میں رہائشی عمارت پر صیہونی بمباری میں مارا گیا تھا۔
خیال رہے کہ رفح میں صیہونی حملے میں فرانسیسی اہلکارسمیت 10 شہریوں کی موت واقع ہوئی تھی۔
رفح میں زور دار دھماکا:
عرب میڈیا کے مطابق رفح میں زوردار دھماکا ہوا جس میں رہائشی مکانات کونشانہ بنایاگیا، دھماکےمیں دو افراد شہید،متعدد زخمی ہیں جنہیں علاج کے لیےکویتی اسپتال منتقل کردیا گیا ہے۔
عرب میڈیا کے مطابق صیہونی فوج نے غزہ میں اپنے مزید دو فوجیوں کی ہلاکت کا اعتراف کیا ہے جس کے بعد غزہ جنگ میں ہلاک صیہونی فوجیوں کی تعداد 121 ہو گئی ہے۔